რეწვის სახელოსნოების ფესტივალს ტურისტული კომპანიის წარმომადგენლები სტუმრობენ

‘ახალციხის ციხის’ ტერიტორიაზე ზედა და ქვედა ნაწილში, უკვე მეორე დღეა რეწვის სახელოსნოების საერთაშორისო ფესტივალი მიმდინარეობს.

დღეს, 15 სექტემბერს ფესტივალს საქართველოს სხვადასხვა რეგიონიდან ტურისტული კომპანიის 43 წარმომადგენელი ესტუმრა, რომლებმაც რეწვის სახელოსნოები დაათვალიერეს და ოსტატების ნამუშევრებს გაეცვნენ.

„მათი სურვილია რეწვის ოსტატებთან შეხვედრა. ისინი, გაცვალიან კონტაქტებს და ეს ყველაფერი სამომავლოდ ტურისტული ტურების დაგეგმვისას დაეხმარებათ. გარდა ამისა, მათთან ცალკე შეხვედრები ჩვენც გვექნება და ვისაუბრებთ სამომავლო გეგმებზე, რა სახით შეიძლება ერთმანეთთან კომუნიკაცია“,–გვითხრა ახალციხის მერიის კულტურის სამსახურის უფროსმა ზაზა თამარაშვილმა.

რეწვის სახელოსნოების ფესტივალი ციხის ტერიტორიაზე მთელი დღის განმავლობაში გაგრძელდება. გამოფენების პარალელურად, რეწვის ოსტატები სხვადასხვა ხელნაკეთის შექმნაში სადემონსტრაციო მასტერკლასებს მართავენ.

ფესტივალში მონაწილეობას, საქართველოს რეგიონების გარდა რეწვის ოსტატები თურქეთიდან, ლატვიიდან, ყაზახეთიდან, ყირგიზეთიდან, ტაჯიკეთიდან, თურქმენეთიდან და უზბეკეთიდან იღებენ.

ფესტივალს საქართველოს ხალხური და გამოყენებითი მუზეუმი, ასევე, საქართველოს ტრადიციული რეწვის ასოციაცია, ახალციხის მერიასა და ახალციხის ციხესთან თანამშრომლობით ატარებენ.

ფესტივალის მიზანია, ტრადიციული რეწვის დარგების პოპულარიზაცია, ადგილობრივი ოსტატების მხარდაჭერა და ციხის ტერიტორიაზე, რეწვის სახელოსნოების მუშაობის პროცესის სანახაობრივი და შემეცნებითი აქტივობების მოწყობით, ისტორიული ძეგლის ახალი ფუნქციით დატვირთვა და ვიზიტორების მოზიდვა.

რეწვის სახელოსნოების საეთაშორისო ფესტივალი ხვალ, 16 სექტემბერს დაიხურება.



[ლუბა გიორგაძე, ახალციხე]