ახალციხის ტურისტულ პოტენციალს უკრაინის საერთაშორისო გამოფენაზე ეცნობიან

საერთაშორისო ტურისტული გამოფენა (Ukraine International Travel & Tourism Show) 27 მარტს დაიწყო. ღონისძიებაში საქართველო 13 დელეგატით არის წარმოდგენილი.

გამოფენაზე ახალციხეს ააიპ "ახალციხის ციხე" და ახალციხის მუნიციპალიტეტის მერია წარმოადგენს. ასევე საქართველოდან აჭარისა და კახეთის ტურისტული კომპანიებიც იღებენ მონაწილეობას.

ახალციხის მერიის საზოგადოებასთან ურთიერთობის სამსახურის განმარტებით, გამოფენის ფარგლებში, ახალციხის მუნიციპალიტეტისა და კერძო სექტორის წარმომადგენლებს შორის შეხვედრები მიმდინარეობს: "მიზანი მუნიციპალიტეტის ცნობადობის ამაღლებაა, რაც ახალციხეში კიდევ უფრო მეტ ტურისტსა და ვიზიტორს მოიზიდავს".

ტურისტულ ღონისძიებებს შორის დაგეგმილია სარეკლამო პლატფორმების, ბაზრის კვლევისა და იმიჯის შექმნის ეფექტურ პლატფორმის ტრენინგ–სემინარები.

გამოფენის ფარგლებში 70-ზე მეტი სემინარი გაიმართება. ახალციხის მერიიდან გასამართ ღონისძიებებში ახალციხის მერიის კულტურის სამსახურის უფროსი, ზაზა თამარაშვილი და მერის მოადგილე, რუბენ კარაპებიტანი მონაწილეობენ.

საერთაშორისო ტურისტული გამოფენა 27 მარტს დაიწყო და 29 მარტამდე გაგრძელდება.
მასში სულ 24 ქვეყნის 366 ტურისტული კომპანია მონაწილეობს.



[ავთო ინასარიძე, ახალციხე]