ახალციხე საერთაშორისო ტურისტული კომპანიების ყურადღების ცენტრში მოხვდა

ახალციხის სტენდი სტამბოლის საერთაშორისო ტურისტულ გამოფენაზე. ფოტო: ახალციხის მერია

აღმოსავლეთ ხმელთაშუა ზღვის საერთაშორისო ტურისტულ გამოფენაზე, EMITT – 2016, საქართველოს ტურიზმის ეროვნულ ადმინისტრაციასთან და საქართველოს სხვა ქალაქებთან ერთად, დელეგაცია ქალაქ ახალციხიდანაც იყო მიწვეული.

გამოფენაში ახალციხის მერი, ახალციხის კულტურის სამსახური და ახალციხის ციხის წარმომადგენლები მონაწილეობდნენ.

როგორც ახალციხის მერიის მიერ გავრცელებულ ინფორმაციაში ვკითხულობთ, ახალციხე ახალი, საინტერესო მიმართულება აღმოჩნდა უამრავი ტურისტული სააგენტოსთვის, რომელთაც მიეწოდათ ყველა საინტერესო ინფორმაცია ქალაქის შესახებ: ტრანსპორტირება,სასტუმროები, ისტორიულ-კულტურული ძეგლები, მესხური ღვინო, სამზარეულო.

გარდა ამისა, გამოფენაზე წარდგენილი ახალციხის სტენდი საუკეთესო სტენდებს შორის მოხვდა და დაჯილდოვდა, როგორც „საუკეთესოდ ორგანიზებული სტენდი“.

მერიის ინფორმაციით, ახალციხის მერი გიორგი კოპაძე სტამბულის გუბერნატორის მოადგილესა და სხვადასხვა ქალაქების მერებს შეხვდა: „რომლებმაც სურვილი გამოთქვეს ახალციხესთან მომავალში ურთიერთობების გაღრმავებისა და ქალაქებს შორის დამეგობრების შესახებ“.
„იყო კონკრეტული შემოთავაზებები არაბეთის გაერთიანებული ემირატებიდან, აღნიშნული ქვეყნისთვის საქართველო და მათ შორის ქალაქი ახალციხეც, მიმზიდველი ტურისტული მიმართულება გახდა“, - ამბობს ახალციხის მერიის კულტურის სამსახურის ტურიზმის, სპორტისა და ახალგაზრდობის საქმეთა განყოფილების უფროსი ლევან მიქაბერიძე.

სტამბულის საერთაშორისო ტურისტული გამოფენა "EMITT“ ორი ათეული წელია იმართება და რეგიონში ერთ-ერთი ყველაზე მასშტაბურ ტურისტულ გამოფენად ითვლება.მასში მსოფლიოს 70-ზე მეტი ქვეყანა მონაწილეობს. გამოფენას 130 000-მდე ტურიზმის სფეროს პროფესიონალი თუ მოგზაურობით დაინტერესებული ვიზიტორი სტუმრობს.


ახალციხის სტენდი EMITT –2016–ზე. ფოტო: ახალციხის მერია


ახალციხის დელეგაცია სტამბოლის საერთაშორისო ტურისტულ გამოფენაზე. ფოტო: ახალციხის მერია


[ნინო ნარიმანიშვილი, ახალციხე]