საპატრიარქოს განცხადების მიუხედავად, აქციის მონაწილეები დაშლას არ აპირებენ [Video]

ორგანიზაცია "საზოგადოებრივი დარბაზის" თავმჯდომარის, აქციის ერთ-ერთი ორგანიზატორის გოდერძი კუბლაშვილის თქმით, მინარეთი არ უნდა დაბრუნდეს სოფელ ჭელაში, ის უნდა დასაწყობდეს ახალციხის საფინანსო სამსახურის ტერმინალში.

„გარდა ამისა, არსებობს ადიგენის მუნიციპალიტეტის საკრებულოს გადაწყვეტილება, რომლის თანახმადაც, უნდა მოხდეს მინარეთის დემონტაჟი, მაშინ შეცვალოს საკრებულომ გადაწყვეტილება, თუ არადა გაიმართოს სასამართლო პროცესი“, - ამბობს კუბლაშვილი.



„საპატრიარქო არ მიიღებს ისეთ გადაწყვეტილებას, რომელიც ჩვენს წინააღმდეგ იქნება მიმართული“,- ამბობს აქციის ერთ-ერთი მონაწილე ადიგენიდან რომან ღვიტიძე და ამატებს, რომ "რეგიონში წინასაარჩევნოდ სააკაშვილმა დიდი ნაღმი ჩადო": „ამ ამბავში სააკაშვილის და ბოკერიას ხელი ურევია. ჩევნ მუსლიმ მრევლს არ დავუპირისპირდებით“.

აქციის ერთ-ერთმა ორგანიზატორმა გიორგი კოპაძემ მართლმადიდებელ მრევლს მობილიზებისკენ მოუწოდა: "ჩვენ დათმობას არ ვაპირებთ, მეუფე გზაშია, მას მოყვებიან მთავრობის წარმომადგენლები, მათი ჩამოსვლის შემდეგ გადავწყვეტთ რა გავაკეთოთ და როგორ. ჩვენი მოთხოვნა უცვლელია, მინარეთი დასაწყობდეს ახალციხეში და არ წავიდეს ჭელაში. თუ ამას არ გადაწყვეტენ, გზაზე დავწვებით და გადაგვიარონ".



კითხვაზე, რას იზამენ იმ შემთხვევაში,თუ ხელისუფლება მიიღებს გადაწყვეტილებას მინარეთის კანონიერი დადგმის შესახებ, კოპაძე აცხადებს, რომ პროტესტს მაინც გააგრძელებენ.

[sknews.ge]