ახალციხეში მთავარ ქუჩაზე ახალდაგებულმა ასფალტმა ერთ ზამთარსაც ვერ გაუძლო

კოსტავას ქუჩაზე გზის მშენებლობა 2018 წლის ბოლოს „საგზაო სამშენებლო სამმართველო N2–მა“ დაასრულა. თუმცა, ახლადდაგებულმა გზამ ერთ ზამთარსაც ვერ გაუძლო და დაზიანდა.

„რომ დავაგეთ მაშინ არანაირი პრობლემა არ ყოფილა, თუმცა ზამთრის პერიოდში რაღაც დაზიანებებმა თავი იჩინა და ახლა მოგვიწია მეორე საფარის გადაგება. ვაკეთებთ ხარისხიანად და კარგად, ეხლა ხელს არაფერი არ გვიშლის. საგარანტიო ვადა სამი წელი მაქვს და ამ პერიოდშ თუ რამე დაზიანდება ისევ მე უნდა შევაკეთო“,– გვითხრა „საგზაო სამშენებლო სამმართველო N2–ის“ დირექტორმა ავთანდილ კაჭკაჭიშვილმა.

ახალციხის მერიაში ამბობენ, რომ „გზაზე ზამთრის ყინვის გამო, პატარა ხარვეზები იყო და ამიტომ კომპანიას მითითებები მიეცა და ის კიდევ ერთ პირს აგებს“.

სამშენებლო კომპანიამ ასფალტის დაგება გუშნ, 10 აპრილს დაიწყო და დღეს დასრულდება.

კოსტავას ქუჩაზე გზის სარეაბილიტაციო სამუშაოებისთვის ახალციხის ადგილობრივი ბიუჯეტიდან 407 707 ლარი დაიხარჯა.



[მარიამ ბარძიმაძე, ახალციხე]