ასპინძაში სასაფლაომდე მისასვლელი გზა ეწყობა

ასპინძაში, ერეკლე მეორეს, ყაზბეგისა და დედაენის ქუჩებიდან სასაფლაოზე მისასვლელი გზაზე ორი კილომეტრის და 100 მეტრის მონაკვეთზე ბეტონი დაიგება.

ასპინძაში, სასაფლაოსთან მისასვლელი გზის რეაბილიტაციაზე ტენდერში გამარჯვებულ კომპანიასთან „საგზაო სამშენებლო სამმართველო N2–თან“ ხელშეკრულება ერთი კვირის წინ გაფორმდა და სამუშაოებიც დაიწყო.

„უფრო ადრეც გვინდოდა დაგვეწყო გზის მშენებლობა, თუმცა აღდგომა დაემთხვა და გადავწყვიტეთ, რომ სასაფლაოზე ხალხის მისვლისთვის ხელი არ შეგვეშალა, დასრულებულიყო ყველაფერი და სამუშაოები მერე დაგვეწყო“,– გვითხრა ასპინძის მერმა როსტომ მაგრაქველიძემ.

ადგილობრივები ამბობენ, რომ სასაფლაოსთან მისასვლელი გზა წლებია ამორტიზებულია და როგორც ტრანსპორტით, ასევე ფეხით გადაადგილება რთულია: „მშრალ გზაზე მანქანა ძლივს დადის და წვიმიან ამინდში საერთოდ ვერ გაივლი".

„საგზაო სამშენებლო სამმართველო N2–მა“ გზაზე სამშენებლო სამუშაოები 90 დღის ვადაში უნდა დაასრულოს.

[ლუბა გიორგაძე, ასპინძა]