ახალციხის მერია კამერა ‘დრონს’ ყიდულობს

დინამიური მართვის კამერის შესაძენად ტენდერი ქალაქის მერიამ 20 ივნისს გამოაცხადა. შესყიდვის სავარაუდო ღირებულება 6000 ლარია.

სატენდერო დოკუმენტაციის მიხედვით, აპარატს უნდა შეეძლოს GPS მიმღების საშუალებით დაგეგმილი მარშრუტის მიხედვით ფრენა და ჰქონდეს ბაზაზე ავარიული დაბრუნების რეჟიმი. ასევე, უნდა ჰქონდეს სპეციალური ვიდეოგადაღების რეჟიმები: „ბაწარზე ფრენა“, „ორბიტალური ფრენა“, გაყოლის რეჟიმი, „სელფის“ რეჟიმი, „პანორამა“, „ელვაშესაკრავი“. უნდა შეეძლოს ფრენის ინფორმაციის გადმოცემა, პირდაპირი რეჟიმის მაღალი გარჩევადობის ვიდეონაკადის გადმოცემა და ჩაწერა, ასევე უნდა შეიძლებოდეს კამერის მიმართულების შეცვლა პირდაპირ რეჟიმში.

როგორც ახალციხის მერიაში განმარტავენ, დინამიური მართვის კამერა ქალაქის ტურისტული პოტენციალის პოპულარიზებისა და სხვადასხვა ღონისძიებების გადასაღებად სჭირდებათ.

„ახალციხის ტურისტული პოტენციალის გაზრდისა და რეკლამირებისთვის, გადავიღებთ სარეკლამო კლიპებს და სხვადასხვა ტურისტულ გამოფენაზე გავავრცელებთ, ასევე, განთავსდება ტურისტულ სააგენტოებში. გარდა ამისა, მოხდება ღონისძიების გადაღება–გაშუქება. „დრონის“ დაქირავება უფრო ძვირი ჯდება წლის განმავლობაში, ვიდრე შეძენა და გავრცელება“,– ამბობენ ახალციხის მერიის საზოგადოებასთან ურთიერთობის სამსახურში.

კითხვაზე – ვინ გადაიღებს დინამიური მართვის კამერით რეკლამებსა და კლიპებს, მერიის საზოგადოებასთან ურთიერთობის სამსახურის წარმომადგენელმა სოფო მესხმა პასუხი არ გაგვცა.

ტენდერში განაცხადების მიღება უკვე დასრულებულია. განაცხადი მხოლოდ ერთ კომპანიას, „მაიმობაილ +“–ს აქვს და ტენდერიც 6000 ლარით აქვს მოგებული. ამ ეტაპზე მერია მასთან მოლაპარაკებებს აწარმოებს.

[ვარლამ წიკლაური, ახალციხე]