ახალციხეში 79 წლის ელენა აკოფიანი დაიკარგა

აკოფიანი სახლიდან 22 მარტს, 05:00 საათზე გავიდა და მას შემდეგ აღარ დაბრუნებულა.

„რომ გავიღვიძე ლოგინში აღარ იწვა, სახლში ვეძებე და რომ ვერ ვნახე ეზოში გავედი, კარი ღია იყო, არ ვიცი რა მოხდა და სად წავიდა“, – ამბობს დაკარგული ქალის მეუღლე.

ოჯახის წევრები ჰყვებიან, რომ დაკარგულს ჯანმრთელობის პრობლემები არ ჰქონდა: „რა მოხდა არ ვიცი, პიჟამოებით და ჩუსტებითაა გასული. ფსიქიკური პრობლემები არ ჰქონია, მარტო წნევა აწუხებდა, წინა დღით სასწრაფოც გვყავდა გამოძახებული, ნებმსები გაუკეთეს და კარგად გახდა“.

დაკარგვადე ერთი დღით ადრე ელენა აკოფიანი ტელეფონით დას ესაუბრა, თუმცა ლიზა ავაკიანმა საეჭვო ვერაფერი შენიშნა: „არაფერი არ ვიცი, წინა დღეს კარგად მელაპარაკა, მეორე დღეს კი მისმა ქმარმა დარეკა თქვენთან ხომ არ მოვიდაო. ვერაფერს ვიტყვი, მე სხვაგან ვცხოვრობ ის კი თავის სახლში იყო“.

79 წლის ქალის გაუჩინარება უკვირთ მეზობლებსაც: „ხშირად იყო გარეთ, ეკლესიაში დადიოდა. ფიზიკურად თავს კარგად გრძნობდა. გარეთ არაფერს ამბობდა და სახლში თუ რამე პრობლემა ჰქონდა ვერ გეტყვით. ჩვენც მაშინ გავიგეთ მდინარის ნაპირას რომ ეძებდნენ, მაგრამ ვერ ნახეს“.

ოჯახის წევრების თქმით, მომხდარი სამართალდამცველებს შეატყობინეს და ძებნაც დაწიყო. იძიებს თუ არა პოლიცია ქალის დაკარგვის ფაქტზე საქმეს, უცნობია. „სამხრეთის კარიბჭე“ შსს–დან პასუხს ამ დრომდე ელოდება.

[თინათინ ზაზაძე, ახალციხე]