ახალნამშობიარები გარდაცვლილი ქალის შვილი ისევ კლინიკაში რჩება

ახალშობილს კლინიკაში 28 მარტიდან დღემდე ექიმები უვლიან. გარდაცვლილის ოჯახის წევრები ამბობენ, რომ ბავშვს სახლში ხვალ, ხუთ აპრილს წაიყვანენ.

„ვთხოვეთ ექიმებს, რომ გასვებენამდე ბავშვი საავადმყოფოში ჰყოლოდათ. გუშინ დავკრძალეთ გარდაცვლილი, დღეს შვიდი გადავიხადეთ. ბავშვს ხვალ წავიყვანთ, ექიმი დანიშნულებას დაგვიწერს, აგვიხსნის რა უნდა ვაჭამოთ და როგორ მოვუაროთ“ – ამბობს გარდაცვლილი ქალის მამამთილი.

გარდაცვლილის ოჯახი ექსპერტიზის პასუხს ელოდება: „ჩვენ დავიღუპეთ, არ გვინდა, რომ ამ მდგომარეობაში სხვაც აღმოჩნდეს. არავის ვადანაშაულებთ, გამოძიება დაადგენს რა მოხდა“.

შეგახსენებთ, რომ ახალციხეში, სოფელ წყრუთში მცხოვრები 23 წლის ქალი კლინიკაში 30 მარტს, დილით გარდაიცვალა. გოგონამ ორი დღის წინ, 28 მარტს, ფიზიოლოგიურად იმშობიარა. საავადმყოფოში ამბობენ, რომ მშობიარობამ გართულებების გარეშე ჩაიარა.

მომხდარზე ძიება შინაგან საქმეთა სამინისტრომ გაუფრთხილებლობით სიცოცხლის მოსპობის ფაქტზე, საქართველოს სისხლის სამართლის კოდექსის 116-ე მუხლის პირველი ნაწილით მიმდინარეობს. აღნიშნულ საქმეს სწავლობს სამედიცინო საქმიანობის სახელმწიფო რეგულირების სააგენტოც.

[თინათინ ზაზაძე, ახალციხე]