11 წლის ბიჭის საქმეზე მშობლებმა დამრიგებელს კლასი დაატოვებინეს

დღეს, 26 მარტს მეექვსე კლასის დამრიგებელმა კლასი დატოვა, სანაცვლოდ კი ბავშვები გაკვეთილებზე გამოცხადდნენ. ეს მშობლების მოთხოვნა იყო. მათი მტკიცებით, 11 წლის ბიჭს კლასში არავინ აბულინგებს, დამრიგებელი კი მის პოზიციას იჭერდა. ამიტომ 14 მშობელი წერილობით ითხოვდა, რომ დამრიგებელს კლასი დაეტოვებინა, სანაცვლოდ კი ის მასწავლებელი დაებრუნებინათ კლასში, რომელსაც 11 წლის ბიჭის ბულინგში ადანაშაულებენ. მშობლებმა ეს პროტესტითაც გამოხატეს და გუშინ, 25 მარტს, არცერთი ბავშვი სკოლაში არ გაუშვეს.

„კლასი დავტოვე, მშობლების ძალადობის გამო. მე დავტოვე კლასი ბავშვების ინტერესებიდან გამომდინარე, იმიტომ რომ მე არ ვარ იმ პედაგოგის მსგავსი, რომელიც ბავშვეზე ძალადობდა და არ მინდა ჩემს ამბიციებს შეეწიროს ბავშვის და სკოლის ინტერესები. უკვე ძალიან დიდი ზეწოლაა ჩემზე. მაგათმა მე ულტიმატუმი წამომიყენეს, რომ ის პედაგოგი უნდა დამეცვა. ჩვეულებრივად მშობლებისგან ბულინგის მსხვერპლი ვარ“, – გვითხრა დამრიგებელმა.

მშობლები დამრიგებლის გადაწყვეტილებას მიესალმებიან: „ის კლასში მხოლოდ ერთი ბავშვის ინტერესებს იცავდა, ამიტომ ვითხოვდით მის წასვლას. რადგან უკვე წავიდა, ბავშვები გაკვეთილებზე ჩვეუელბრივ გავუშვით“.

სკოლის დირექცია ჯერ შექმნილ ვითარებაზე კომენტარს არ აკეთებს. სკოლაში რჩება მანდატურის სამსახურიდან ჩამოსული ფსიქოლოგების ჯგუფი. თუმცა, 11 წლის ბიჭი, 18 მარტის შემდეგ, ჯანმრთელობის მდგომარეობის გაუარესების გამო სკოლაში არ დადის.

ახალციხის ერთ–ერთ სკოლაში, მეექვსე კლასელი ბიჭის ბებია და დედა, მასწავლებელსა და მოზარდის თანაკლასელებს ბავშვის მიმართ ბულინგში ადანაშაულებს. ამ საქმეზე მასწავლებელს სკოლის დისციპლინურმა კომიტეტმა დარღვევა დაუდგინა და სახდელიც დააკისრა. მასწავლებელი ბავშვზე ზეწოლას კატეგორიულად უარყოფს, თუმცა, დისციპლინური კომიტეტის გადაწყვეტილების შემდეგ მან კლასი დატოვა. ამის გამო. კლასში ყველა, 14–ვე ბავშვის მშობელი 11 წლის ბიჭს დაუპირისპირდა. დედები ირწმუნებიან, რომ ბავშვი და მისი ბებია ცრუობს, მოზარდი სკოლაში არავის დაუჩაგრავს და ყველაფერი მოგონილია.

11 წლის ბიჭის ბულინგის მიზეზი ის გახდა, რომ მან სკოლაში მომხდარი ჩხუბის დროს პოლიციაში დარეკა. როგორც მეექვსეკლასელი ბიჭის დედა ამბობს, ბავშვზე ზეწოლა ორ თვეზე მეტ ხანს გაგრძელდა, რის შედეგადაც მოზარდს ფსიქიკური პრობლემები შეექმნა.

[მარიამ ბარძიმაძე, ახალციხე]