11 წლის ბიჭი სკოლაში დაბრუნდა, მის კლასს კი ახალი დამრიგებელი ჰყავს

ბავშვი სკოლაში ფსიქოლოგების რჩევით დაბრუნდა.

„მითხრა წავალ სკოლაში, ოღონდ შენც გამომყევიო და გამოვყევი, მე გარეთ ვდგავარ და ის კი გაკვეთილზე ზის. ფსიქოლოგებიც ჩვენც ვესაუბრებოდით, რომ ეს ყველაფერი უნდა გადალახოს და სკოლაში დაბრუნდეს“, – ამბობს დედა.

მისივე თქმით, თუ ბავშვი ისევ ცუდად გახდა, სხვა სკოლაში გადაიყვანს.

11 წლის ბიჭის კლასს უკვე ახალი დამრიგებელი ჰყავს, იგი ამავე კლასს ქართულსაც ასწავლის. ყოფილ დამრიგებელს კი კლასი 14–მა მშობელმა იმის გამო დაატოვებინა, რომ იგი 11 წლის ბიჭის პოზიციას იცავდა.

ახალციხის ერთ–ერთ სკოლაში, მეექვსე კლასელი ბიჭის ბებია და დედა, მასწავლებელსა და მოზარდის თანაკლასელებს ბავშვის მიმართ ბულინგში ადანაშაულებს. ამ საქმეზე მასწავლებელს სკოლის დისციპლინურმა კომიტეტმა დარღვევა დაუდგინა და სახდელიც დააკისრა. მასწავლებელი ბავშვზე ზეწოლას კატეგორიულად უარყოფს, თუმცა, დისციპლინური კომიტეტის გადაწყვეტილების შემდეგ მან კლასი დატოვა. ამის გამო კლასში ყველა, 14–ვე ბავშვის მშობელი 11 წლის ბიჭს დაუპირისპირდა. დედები ირწმუნებიან, რომ ბავშვი და მისი ბებია ცრუობს, მოზარდი სკოლაში არავის დაუჩაგრავს და ყველაფერი მოგონილია. ამ მიზეზით მშობლებმა დამრიგებლის კლასიდან წასვლაც მოითხოვეს და პროტესტის ნიშნად, 25 მარტს, ბავშვები სკოლაში არ გაუშვეს. მეორე დღეს კი დამრიგებელმა კლასი დატოვა.

საქმეს ახალციხის რაიონული სამმართველო ძალადობის მუხლით იძიებს.

[მარიამ ბარძიმაძე, ახალციხე]