ახალციხელი მოსწავლე ‘გურული დღიურების’ სტიპენდიანტი გახდა

სტიპენდიანტების დაჯილდოვება თბილისში, 21 მარტს გაიმართა.

„გურული დღიურების“ ფონდი ორი წლის წინ დაარსდა. მისი მიზანი იმ სტუდენტებისა და მოსწავლეების დახმარებაა,რომლებიც კარგი სწავლით გამოირჩევიან, თუმცა შეჭირვებული ოჯახებიდან არიან. ფონდი სპონსორების მოპოვებაზე და მათი საშუალებით წარჩინებული სტუდენტებისა და მოსწავლეების დაფინანსებაზე მუშაობს. „ბავშვები სტიპენდიას აუცილებლად უნდა საჭიროებდნენ, სხვა შემთხვევეაში არ გაიცემა“, – აცხადებენ ფონდის ადმინისტრაციაში.

ფონდ ‘გურული დღიურების’ დირექტორის ქეთი გოგავას თქმით, ახალციხელი მოსწავლისთვის სტიპენდიის დანიშვნა, ერთ–ერთი ადგილობრივი ბიზნესმენის ინიციატივა იყო, რომელსაც ვინაობის გამხელა არ სურს: „თავად დაგვიკავშირდა და გვითხრა, რომ ფონდის საშუალებით სტიპენდიას დაუნიშნავდა მოსწავლეს, რომელიც კარგი სწავლით გამოირჩევა. ვფიქრობთ, რომ ეს თანხა მოსწავლეს საკუთარი შესაძლებლობების უკეთ წარმოჩენაში დაეხმარება".

როგორც ახალციხის პირველი საჯარო სკოლის დირექტორი ჟუჟუნა გოგოლაური გვეუბნება, ზურაბ ბოჭორიშვილი სკოლის ერთ–ერთი წარჩინებული მოსწავლეა: „ძალიან კარგი მოსწავლეა“.

ზურაბ ბოჭორიშვილი თანხის შეგროვებას ანაბარზე აპირებს.

„სკოლაში კარგად სწავლობს, ცეკვავს და რაც მთავრია და ყველაზე მეტად უყვარს ხელოვნება, მარცხენა ხელით ხატავს, მუშაობს თიხაზე, თექაზე ალბათ ამ მიმართულებით გამოვიყენებთ თანხას“, – გვითხრა ზურაბ ბოჭორიშვილის დედამ სოფო კაპანაძემ.

ფონდ „გურულმა დღიურებმა“ ახალციხელ მოსწავლესთან ერთად, სპონსორის საშუალებით სტიპენდია კიდევ ერთ, ლანჩხუთის მუნიციპალიტეტის სოფელ ჩიობათის საჯარო სკოლის მოსწავლეს მაია პატარაიას გადასცა.

[ლუბა გიორგაძე, ახალციხე]