დაუნის სინდრომის საერთაშორისო დღე ახალციხეშიც აღინიშნა [R]

ცენტრალურ პარკში გამართული აქციის ფარგლებში გაიმართა სამხატვრო სკოლის მოსწავლეთა მიერ, დაუნის საერთაშორისო დღის თემაზე შესრულებული ნახატების გამოფენა, თავიანთი ნამუშევრები წარმოადგინეს ქალაქ ახალციხის მეშვიდე საჯარო სკოლის მოსწავლეებმაც. ღონისძიების სტუმრები განსაკუთრებული ხალისით ხატვასა და სპორტულ აქტივობებში ჩაერთნენ. სამახსოვრო ფოტოსესიის შემდეგ კი, მერიის კულტურის სამსახურის თანამშრომლებმა ისინი სამახსოვრო საჩუქრებითაც გაახარეს.

აქციაში ქალაქის მაცხოვრებლებთან ერთად, ახალციხის მუნიციპალიტეტის მერის პირველმა მოადგილემ გურამ მელიქიძემ, სამხარეო ადმინისტრაციისა და ადგილობრივი თვითმმართველობის წარმომადგენლებმა მიიღეს მონაწილეობა. გურამ მელიქიძის განცხადებით - „მნიშვნელოვანია, რომ ამ დღეს ახალციხის მუნიციპალიტეტიც უერთდება, ჩვენი აქციის მიზანია აღნიშნული სინდრომის მქონე ადამიანებს, როგორც საზოგადოების სრულფასოვან წევრებს, კიდევ ერთხელ ვაგრძნობინოთ ჩვენი კეთილგანწყობა, თანადგომა და სიყვარული".




დაუნის სინდრომის საერთაშორისო დღისადმი მიძღვნილი ღონისძიებები გაიმართა ახალციხის მუნიციპალიტეტის ყველა საბავშვო ბაღში. აქციის მიზანს სკოლამდელი აღზრდის დაწესებულებებში ამ დღისადმი ცნობიერების ამაღლება წარმოადგენდა. ღონისძიებებს ქალაქის N1, N6 საბავშვო ბაღსა და ფსიქოლოგიური მომსახურების ცენტრში „მწვანე სახლი“, სამცხე-ჯავახეთის მხარეში სახელმწიფო რწმუნებული ბესიკ ამირანაშვილი და ახალციხის მუნიციპალიტეტის მერი ზაზა მელიქიძე, სამხარეო ადმინისტრაციისა და ადგილობრივი თვითმმართველობის წარმომადგენლებთან ერთად დაესწრნენ. აქტივობებს ასევე, საპატიო სტუმრის სტატუსით ესწრებოდა პოლონეთის რესპუბლიკის ჰუმანიტარული ორგანიზაციის გამგეობის წევრი არტურ ნემჩიკი. დაუნის სინდრომის მქონე აღსაზრდელებმა თანატოლებთან ერთად ხატვასა და სპორტულ შეჯიბრებებში მიიღეს მონაწილეობა, ღონისძიების ბოლოს კი პატარები სტუმრებისგან სათამაშოებით დასაჩუქრდნენ.