ახალციხეში დაუნის სინდრომის დღე აღნიშნეს [Photo]

დღეს, 21 მარტს ახალციხის მეშვიდე საჯარო სკოლის და ასევე, სამხატვრო სკოლის მოსწავლეებმა ქალაქის ცენტრალურ პარკში, დაუნის სინდრომის დღესთან დაკავშირებით, საკუთარი ნამუშევრები გამოფინეს.

"გამოტანილი გვაქვს, ჩვენი გაკეთებული საყვავილეები, მოხატული თეფშები ამ ყველაფერს ბავშვები და აღმზრდელები მთელი წლის განმავლობაში ერთად აკეთებენ", – ამბობს ახალციხის მეშვიდე საჯარო სკოლის ფსიქოლოგი დალი ასპანიძე.

გამოფენის პარალელურად, მერიის კულტურის სამსახურმა პატარებისთვის სპორტული აქტივობაც მოაწყო. ის ვინც ყველაზე მეტ ფერად ბურთს კალათში ჩააგდებდა, სიმბოლურ საჩუქრებს გადასცემდა.



ასევე დღეს, სამცხე–ჯავახეთის სამხარეო ადმინისტრაციისა და ახალციხის მერიის თანამშრომლებმა ახალციხის პირველ საბავშვო ბაღში პატარებთან ერთად ხელებზე ფერადი წინდები წამოიცვეს და სიმბოლურად ფოტოები გადაიღეს.

21 მარტს, დაუნის სინდრომის დღესთან ერთად, ტყის საერთაშორისო დღეც აღინიშნება. საჯარო მოხელეებმა პირველი ბაღის ეზოში ფიჭვის ნერგები დარგეს.








21 მარტი 2011 წელს, გაერთიანებული ერების ორგანიზაციის ეგიდით, დაუნის სინდრომის საერთაშორისო დღედ გამოცხადდა. ამ დღეს, დაუნის სინდრომის შესახებ ცნობადობის ამაღლების მიზნით სხვადასხვა ღონისძიება იმართება და მსოფლიოს უმრავლეს ქვეყანაში, მათ შორის საქართველოში 2012 წლიდან აღინიშნება.

ამასთანავე დღეს არის ტყის საერთაშორისო დღე, რომელიც გაეროს გენერალური ანსამბლეის მიერ 1971 წელს დაწესდა. იგი ტყის მნიშვნელობის შესახებ საზოგადოების ცნობიერების ამაღლებასა და გამეჩხერებული ტერიტორიების შევსება-აღდგენას ისახავს მიზნად.

[sknews.ge]