დაუნის სინდრომის საერთაშორისო დღე ახალციხეში

ახალგაზრდული ცენტრის ახალგაზრდები ცენტრალურ პარკში შეიკრიბნენ. მათ დაუნის სინდრომის შესახებ ცნობიერების ამაღლების მიზნი, მოსახლეობას საინფორმაციო ბუკლეტები დააურიგეს და ქვის ფილებზე ცარცით წარწერა –„46+1 დაუნის სინდრომი“ დააწერეს.

„ახალციხის ახალგაზრდული ცენტრი უერთდება დაუნის სინდრომის მსოფლიო დღეს. ჩვენ კიდევ ერთხელ გვინდოდა შეგვეხსენებინა, რომ დაუნის სინდრომის მქონე პირები ჩვენი მეგობრები არიან და მეგობრები ქრომოსომებს არ ითვლიან“,– –განაცხადა ახალციხის ახალგაზრდული ცენტრის დირექტორმა მაკა სუდაძემ.

ახალციხის ახალგაზრდული ცენტრის ორგანიზებით, სამოქალაქო განათლების პროგრამა „მომავლის თაობის“ ფარგლებში, მსგავსი სახის აქცია სამცხე–ჯავახეთის ყველა მუნიციპალიტეტში გაიმართა.

შეგახსენებთ, რომ დაუნის სინდრომი 21-ე ქრომოსომის ტრისომიით (ანომალია) გამოწვეული გენეტიკური მდგომარეობაა, რომელიც ადამიანებში იწვევს ინტელექტუალურ შეზღუდულობას. დაუნის სინდრომი გვხვდება მსოფლიოს ყველა რეგიონში და მისი გამომწვევი მიზეზები ამ დრომდე უცნობია.

დაუნის სინდრომის საერთაშორისო დღის აღსანიშნავად მე-3 თვის 21-ე დღის არჩევის მიზეზი, 21-ე ქრომოსომის ტრისომიის უნიკალურობისათვის ხაზგასმის სურვილი გახდა. სწორედ ეს გენეტიკური ცვლილება იწვევს დაუნის სინდრომის განვითარებას.

დაუნის სინდრომის საერთაშორისო დღე პირველად 2006 წელს აღინიშნა მსოფლიოს სხვადასხვა ქვეყანაში. 2011 წლის დეკემბერს გაერთიანებული ერების ორგანიზაციის გენერალურმა ასამბლეამ 21 მარტი დაუნის სინდრომის საერთაშორისო დღედ გამოაცხადა და მოუწოდა ყველა გაეროს წევრ ქვეყანას, აგრეთვე მის სტრუქტურაში შემავალ სააგენტოებს, არასამთავრობო ორგანიზაციებს, კერძო სექტორის წარმომადგენლებსა და სამოქალაქო სექტორის აქტივისტებს 2012 წლიდან მომხდარიყო მისი ყოველწლიური აღნიშვნა.





[ლუბა გიორგაძე, ახალციხე]