საქართველოსა და სომხეთის რძის სექტორის ფერმერებმა ერთმანეთს გამოცდილება გაუზიარეს

კონფერენცია გაეროს სურსათისა და სოფლის მეურნეობის ორგანიზაციამ (FAO) და აგრობიზნესისა და სოფლის განვითარების ცენტრმა (CARD) გამართა. მისი მიზანი საქართველოსა და სომხეთში, რძის სექტორში ჩართულ ფერმერებსა და მომწოდებლებს შორის საბაზრო კავშირების გაძლიერება და საუკეთესო ფერმერული პრაქტიკების ურთიერთგაზიარებაა. FAO ორივე ქვეყნის კერძო სექტორთან თანამშრომლობს და ხელს უწყობს ინფორმაციის მიმოცვლას ორი ქვეყნის ბაზრებზე არსებული ახალი ტექნოლოგიებისა და ნედლეულის შესახებ.

ღონისძიების მონაწილეებმა საქართველოსა და სომხეთში, მეცხოველეობის სექტორში არსებულ გამოწვევებზე ისაუბრეს და დარგის განვითარების შესაძლებლობები განიხილეს, ცხოველთა საკვების, საქონლის მოვლა-შენახვის ტექნოლოგიებისა და გენეტიკის გაუმჯობესების ხარჯზე. საქართველოსა და სომხეთში სასოფლო-სამეურნეო ნედლეულისა და სერვისების მომწოდებელმა კომპანიებმა - Nutrimax, DeLaval, Alta Genetics, Maisadour - კონფერენციაზე საკუთარი პროდუქტები, ტექნიკა და ტექნოლოგიები წარმოადგინეს.

2017 წლის დეკემბრიდან დღემდე, FAO-მ და CARD-მა, საქართველოს რძის ფერმერთა ასოციაციასთან ერთად, საქართველოსა და სომხეთის რძის სექტორში არსებული მდგომარეობის შესასწავლად, რამდენიმე კვლევა განახორციელეს. შედეგად, დარგში არსებული პრობლემები და მათი აგაუმჯობესების გზები გამოიკვეთა. დღევანდელი კონფერენცია, სადაც ორი ქვეყნის რძის სექტორის წარმომადგენლებმა თავიანთი გამოცდილებები გაცვალეს, რძის სექტორის გაძლიერების პროგრამის ნაწილია.

[sknews.ge]