რძის მწარმოებელ კოოპერატივებს მცირე საველე ლაბორატორიები გადაეცემათ

საქართველოს პრემიერ–მინისტრის გიორგი კვირიკაშვილის განმარტებით, აღნიშნული პროგრამა სოფლად წვრილი მეწარმეობის განვითარებას შეუწყობს ხელს.

„პროგრამა საშუალებას მისცემს მესაქონლეობის სასოფლო-სამეურნეო კოოპერატივებს მოაწყონ არამარტო რძის შემკრები პუნქტი, არამედ ასეთ კოოპერატივებს გადაეცემათ რძის ხარისხის შესამოწმებელი აპარატურა, რომელიც 40 ათასიდან 75 ათასამდე ლარის ღირებულებისაა. დღეს დაახლოებით 30–მდე ასეთი კოოპერატივია. ეს პროგრამა მათ დაეხმარება არა მხოლოდ შეაგროვონ ადგილებზე რძე და შემდგომში მიაწოდონ უფრო მსხვილ მწარმოებლებს, არამედ თვითონაც აწარმოონ რძის პროდუქტები და მათ შორის ყველის წარმოებაზე გადავიდნენ", – განაცხადა გიორგი კვირიკაშვილმა.

"რძის მწარმოებელი სასოფლო-სამეურნეო კოოპერატივების მხარდაჭერის სახელმწიფო პროგრამა", რომლის ღირებულება 360 000 ლარია, მთავრობამ დღეს, 25 მარტს დაამტკიცა.

[sknews.ge]