‘ჩვენ არ ვითვლით ქრომოსომებს’- ახალგაზრდების აქცია ცნობიერების ასამაღლებლად

ახალციხეში, ცენტრალურ პარკში, კერძო სკოლა „მზექას“ მოსწავლეებმა, საინფორმაციო აქცია 15:00 საათზე დაიწყეს. ახალგაზრდებმა, რომელთაც ხელებზე სოლიდარობის გამომხატველი ჭრელი წინდები ეკეთად, ადგილობრივებს დაურიგეს საინფორმაციო ბუკლეტები და ფერადი საჰაერო ბურთები, დაუნის სინდრომის შესახებ სხვადასხვა წარწერებით.

„ჩვენ გვინდოდა, რომ ადამიანები კიდევ ერთხელ დაგვეფიქრებინა რა არის დაუნის სინდრომი. დაუნი არ უდა გამოვიყენოთ სალანძღავ სიტყვად, რაც სამწუხაროდ, ხდება ხოლმე“, – გვიტხრა აქციის ერთ–ერთმა მონაწილემ, მეათეკლასელმა ვერონიკა გვარამაძემ.

საინფორმაციო აქცია, რეგიონის სხვადასხვა ქალაქში, ახალციხის ახალგაზრდული ცენტრის ორგანიზებით, სამოქალაქო განათლების პროგრამა „მომავლის თაობის“ ფარგლებში გაიმართა. აქციაში რეგიონიდან 42 სკოლა ჩაერთო.

ასპინძაში, სოფელ ზველში მცხოვრებ ალიკა ზედგინიძეს, ახალგაზრდები სახლში ტკბილეულით ესტუმრნენ და სპეციალურად მისთვის, მინი წარმოდგენაც გამართეს.

21 მარტი დაუნის სინდრომის საერთაშორისო დღეა. მსოფლიოს ბევრ ქვეყანაში და მათ შორის საქართველოშიც, ამ დღეს დაუნის სინდრომის შესახებ ცნობიერების ამაღლებისა და საზოგადოების მეტად ინფორმირების მიზნით სხვადასხვა ღონისძიებები იმართება. 21 მარტი დაუნის სინდრომის საერთაშორისო დღედ გაერთიანებული ერების ორგანიზაციის ეგიდით 2011 წელს დაწესდა.

[sknews.ge]