ბორჯომში საცურაო აუზის საქმეზე მშენებელი პასუხისგებაში მისცეს

საქმე ბორჯომის ისტორიული პარკის საზაფხულო აუზს ეხება.

შპს „დ.ხ კომპანიმ“ ბორჯომის მუნიციპალიტეტის მერიის მიერ გამოცხადებულ ტენდერში 2017 წელს გაიმარჯვა. სატენდერო დოკუმენტების მიხედვით კომპანიას ბორჯომის პარკში საცურაო აუზის შენობის ვერანდა 69 133 ლარში უნდა გადაეხურა. თუმცა, დათქმულ ვადაში სამუშაოების დასრულება ვერ შეძლო.

ფინანსთა სამინისტროს საგამოძიებო სამსახურმა შპს „დ.ხ კომპანის“ დირექტორის მინდობილი პირი გივი ახობაძე მუნიციპალიტეტის თანხების მითვისების ფაქტზე სსკ–ის 182 მუხლის 3–ე ნაწილის „ბ“ პუნქტით პასუხისგებაში მისცა, რაც დიდი ოდენობით თანხის მითვისებას გულსიხმობს.

„ინფრასტრუქტურული პროექტის განხორციელებისას ახობაძემ რეალურად შესრულებული სამუშაოების მოცულობა გაზარდა“, – გვითხრეს ფინანსთა სამინისტროს საგამოძიებო სამსახურში.

ამავე საქმეზე, ოღონდ სამოქალაქო წესით, ბორჯომის მერიამ სასამართლოში უკვე იჩილვა და მოიგო კიდეც. მერია „დ.ხ. კომპანიას“ ნაკისრი ვალდებულებების შეუსრულებლობას ედავებოდა.

„კომპანიისგან ვითხოვთ ჯარიმის, პირგასამტეხლოს და ავანსის თანხის დაბრუნებას. პირველი ინსტანციის, ახალციხის რაიონულ სასამართლოში ბორჯომის მუნიციპალიტეტის სარჩელი სრულად დაკმაყოფილდა“, – განაცხადეს ბორჯომის მერიის საზოგადოებასთან ურთიერთობის სამსახურში.

შეკითხვაზე, რამდენი ლარის გადახდა დაეკისრა კომპანიას, ბორჯომის მუნიციპალიტეტის მერიაში არ გვპასუხობენ. ინფორმაციის მისაღებად წერილობით მიმართვა გვთხოვეს ახალციხის რაიონულ სასამართლოშიც.

შპს „დ.ხ კომპანის“ სამუშაოები ხელშეკრულების გაფორმებიდან, 2017 წლის 29 ივნისიდან, 45 დღის ვადაში უნდა დაესრულებინა. სატენდერო დოკუმენტებში ჩანს, რომ კომპანიამ სამუშაოები დათქმულ ვადაში ვერ შეასრულა და 10–დღიანი გადავადება ითხოვა.

„სამხრეთის კარიბჭე“ გივი ახობაძეს ტელეფონით დაუკავშირდა, თუმცა მან ამ საკითხზე საუბარი არ ისურვა: „ჯერ კიდევ მიმდინარეობს ძიება, ამიტომ ვიდრე არ დასრულდება კომენტარს ვერ გავაკეთებ“.

სისხლის სამართლის საქმის ძიების პარალელურად სამოქალაქო წესით დავა გრძელდება სასამართლოშიც. „დ.ხ კომპანიმ“ ახალციხის რაიონული სასამართლოს გადაწყვეტილება თბილისის სააპელაციო სასამართლოში გაასაჩივრა.

ბორჯომის მერიაში აცხადებენ, რომ მას შემდეგ რაც მათ სასამართლოს მიმართეს აუზის სარეაბილიტაციო სამუშაოები შეჩერებულია: „რა გაკეთდება ამ ტერიტორიაზე ჯერ გადაწყვეტილი არ არის. შეიძლება აღნიშნული ფართი სხვა ფუნქციით დაიტვირთოს“.



ბორჯომის პარკში არსებულ საზაფხულო აუზს რეაბილიტაცია ჯერ კიდევ 2014 წელს ჩაუტარდა. ამ წელს სამუშაოებისთვის ცენტრალური ბიუჯეტიდან 423 512 ლარი გამოიყო. გადაიხურა აუზი, გარემონტდა გასახდელები, საშხაპეები, ვესტიბულის და სატრენაჟორო დარბაზები. აღნიშნულ თანხაში აგრეთვე გათვალისწინებული იყო 9 აპრილის ქუჩის ფეხით სავალი ნაწილებისა და მოაჯირების რეაბილიტაცია, დეკორატიული განათებების დამონტაჟება და 9 აპრილის ქუჩაზე მდებარე დასასვენებელი აივნების რეაბილიტაცია.

თვითმმართველობაში აცხადებენ, რომ ეს, აუზის რეაბილიტაციის მეორე ეტაპი იყო.



[თინათინ ზაზაძე, ბორჯომი]