’რომ მოეთხოვათ სხდომაზე მივიდოდით’ – ახალციხის მერის პასუხი დეპუტატებს

„სამსახური მაშინ უნდა მივიდეს საკრებულოს სხდომაზე, როცა მათი საკითხი გადის. გუშინ ინფრასტრუქტურის საკითხი არ გადიოდა. რომელი სამსახურის ანგარიშიც გაჰქონდათ, მისი თანამშრომლები იყვნენ კიდეც. ერთ წუთში, რომელიმე სტრუქტურის წარმომადგენელი საკრებულოში ვერ მივა, მინიმუმ ნახევარი საათით ადრე მაინც უნდა მიეწოდებინათ ინფორმაცია, რომ მისულიყვნენ. მოთხოვნა არ ყოფილა და ამიტომ ვერც ვერავინ იქნებოდა“, – ასე პასუხობს ახალციხის მერი ზაზა მელიქიძე, გუშინ, 18 თებერვალს, ახალციხის საკრებულოს სხდომაზე დეპუტატების მიერ გამოთქმულ საყვედურს იმის შესახებ, რომ საკრებულოში ინფრასტრუქტურის სამსახურის წარმომადგენელები არ მიდიან.

ზაზა მელიქიძე აცხადებს, რომ მერიიდან დეპუტატებს ინფორმაციას ნებისმიერ საკითხზე აწვდიან: „დასამალი არაფერია, არ ვიცი დეპუტატები რატომ ფიქრობენ ასე“.

ახალციხის მერიაში ინფრასტრუქტურის სამსახურს წელიწადზე მეტია უფროსი არ ჰყავს. საჯარო მოხელეთა შესარჩევი კონკურსის დროს ამ პოზიციაზე განაცხადი არავინ შეიტანა. ამიტომ ხელმძღვანელის მოვალეობას განყოფილების უფროსები ითავსებენ.

„თითოეული თანამშრომელი ორმაგად შრომობს, ჩემთან ერთად მუშაობენ ღამის 10–11 საათამდე. ძალიან ბევრი საქმეა „სოფლის მხარდაჭერის პროგრამები, რეგფონდის პროექტები, მოქალაქეების წერილები“, – ამბობს მელიქიძე და ამატებს, რომ იგი ნებისმიერ დროს მზადაა დეპუტატებთან სასაუბროდ – „ისედაც ვგეგმავ მათთან შეხვედრას. გუშინაც მინდოდა მისვლა სხდომაზე, მაგრამ ახალგაზრდული პარლამენტი იყო ჩვენთან სტუმრად, სხვადასხვა საკითხზე ვმსჯელოდბით, შეხვედრა გაგრძელდა და ვერ მივედი, მაგრამ ეს არ ნიშნავს იმას, რომ აქტიური კავშირი არ გვაქვს საკრებულოსთან“.

რაც შეეხება დეპუტატ ამბარცუმ ბაბოიანის განცხადებას, იმის შესახებ, რომ ჯაყელის ქუჩაზე, მოქალაქეებთან შეხვედრის დროს, მას მერიის ინფრასტრუქტურის სამსახურიდან, ამავე ქუჩაზე განსახორციელებელი პროექტების შესახებ ტელეფონით არასწორი ინფორმაცია მიაწოდეს, მერი სიცრუეს უწოდებს.

„მე და ინფრასტრუქტურის სამსახურის თანამშრომლები საპროექტო ორგანიზაციასთან ერთად ობიექტზე ვიყავით გასულები, როცა დეპუტატმა დარეკა და ამბობდა, უბანზე ვართ და მოდითო. იმ წუთში ვერავინ მივიდოდა, ეს შეუძლებელი იყო. თუმცა, იმავე დღეს ამ ქუჩის მოსახლეობასაც შევხვდით და ამ დეპუტატსაც“, – აცხადებს მელიქიძე.

გუშინ, 18 თებერვალს ახალციხის მუნიციპალიტეტის საკრებულოს დეპუტატებმა განაცხადეს, რომ ინფრასტრუქტურის სამსახური კარგად არ მუშაობს, გარდა ამისა მათ, თავიანთ სამოქმედო არიალში დაგეგმილი ინფრასტრუქტურული პროექტების შესახებ ინფორმაცია არ აქვთ.

[თინათინ ზაზაძე, ახალციხე]