გარემოს დაცვის საერთაშორისო დღე

5 ივნისი გარემოს დაცვის დღედ 1972 წლის 15 დეკემბერს გამოცხადდა. გარემოს დაცვის მსოფლიო დღის აღნიშვნა მიზნად ისახავს საზოგადოების ჩაბმას გარემოს შენარჩუნებისა და გაუმჯობესებისათვის ბრძოლაში.

ამ დღესთან დაკავშირებით დემოკრატიული ჩართულობის ცენტრში სამცხე-ჯავახეთის რეგიონულ გარემოსდაცვითი კავშირ ”ეკოდახას” წარმომადგენლები ახალციხის პირველი და მეექვსე საჯარო სკოლის მოსწავლეებსა და ეკო-კლუბის წევრებს შეხვდნენ და საქართველოს დაცული ტერიტორიების შესახებ ესაუბრნენ.

საუბარი შეეხო დაცული ტერიტორიების განახლებულ ინფრასტრუქტურასა და მომსახურებასაც.

გარდა ამისა, შეხვედრის მონაწილეებს გააცნეს ინფორმაცია რა სახის ტურების ორგანიზებაა შესაძლებელი და რა აკრძალვები უნდა გაითვალისწინოს მოსახლეობამ დაცულ ტერიტორიებზე მოგზაურობისას.

”2012 წელი გარემოსდაცვითი განათლების წელია. ”ეკოდახა” აგრძელებს საგანმანათლებლო ღონისძიებებს და დღევანდელი შეხვედრის მიზანს გარემოსდაცვითი ცნობიერების ამაღლება წარმოადგენს. შეხვედრის მონაწილეებს ჩვენი ქვეყნის უნიკალური ბუნების შესახებ მეტი ინფორმაცია მივაწოდეთ და პოპულარიზაცია გავუწიეთ დაცულ ტერიტორიებს”, - ამბობს გარემოსდაცვითი ორგანიზაცია ”ეკოდახას” წარმომადგენელი ხათუნა ხმალაძე.

შეხვედრის ბოლოს საქართველოს დაცული ტერიტორიების შესახებ ფილმის ჩვენება გაიმართა. შეხვედრის მონაწილეებს საჩუქრად ბორჯომ-ხარაგაულის ეროვნული პარკის გზამკვლევები დაურიგდათ.

[თამარ თოთაძე, ახალციხე]