სამხარეო სამმართველოდან ყველა დაკავებული გაათავისუფლეს

სამცხე-ჯავახეთის სამხარეო სამმართველოს შენობა რამდენიმე წუთის წინ იმ სამმა დაკავებულმაც დატოვა, რომელთა მიმართაც საქმე სისხლის სამართლის 353-ე მუხლის მეორე ნაწილითაა აღძრული.

ერთ-ერთი მათგანი ვახტანგ მარკოიძე "სამხრეთის კარიბჭესთან" საუბარში ამბობს, რომ პოლიციისთვის ფიზიკური შეურაცხყოფა არ მიუყენებიათ.

"ვიდექით და ალყის გარღვევას ვცდილობდით, დაზიანებები არ მიგვიყენებია, როგორ შევძლებდით ამას ხელში არაფერი ჩვენ არ გვქონდა. ისინი ბევრნი იყვნენ, ჩვენ უსუსები ვიყავით", - ამბობს იგი.

მარკოიძეს უკვირს, ახლა რატომ აღმოაჩინეს დარღვევები და უკანონობა, მაშინ როცა მინარეთმა ამხელა გზა გაიარა ჭელამდე.

მიუხედავად იმისა, რომ ყველა დაკავებული თავისუფალია, მუსლიმები დაშლას არ აპირებენ.

"ჩვენ მაინც არ დავიშლებით, ვიდრე მინარეთის საკითხი არ გაირკვევა", - ამბობს სამცხე-ჯავახეთის მუსლიმთა წინამძღვარი მამუკა ვაშაყმაძე.



[sknews.ge]