უნივერსიტეტის ჯილდო გაზეთ ‘მესხეთის უნივერსიტეტის’ რედაქტორს

საიუბილეო ღონისძიება სამცხე–ჯავახეთის უნივერსიტეტის სამეცნიერო ბიბლიოთეკაში, დღეს, 3 მაისს გაიმართა. საიუბილეო საღამოს უნივერსიტეტის ხელმძღვანელობა, თანამშრომლები, მარინა ზედელაშვილის კოლეგები და მისი ყოფილი სტუდენტები ესწრებოდნენ.

„ჟურნალისტისთვის ეს დაფასება მნიშვნელოვანია. ეს მარტო მე არ მეკუთვნის, ყველა ჟურნალისტს ეკუთვნის, რადგან ყველა იმსახურებს ამას“, – განაცხადა ღონისძიების დასრულების შემდეგ მარინა ზედელაშვილმა.

ღონისძიების დასასრულს, სამცხე–ჯავახეთის სახელმწიფო უნივერსიტეტის რექტორმა მერაბ ბერიძემ, მარინა ზედელაშვილს სარედაქციო–საგამომცემლო საქმიანობისა და ჟურნალისტიკის განვითარებაში შეტანილი წვლილისთვის უნივერსიტეტის სახელობის მედალი გადასცა.

„ამ საღამოს ჩატარება ჩვენი ინიციატივა იყო, ვეცადეთ მარინა ზედელაშვილის უნივერსიტეტისადმი დამსახურება გამოგვეხატა იმ უმაღლესი ჯილდოთი რასაც, უნივერსიტეტის მედლი ჰქვია“, – განაცხადა უნივერსიტეტის რექტორმა.

მარინა ზედელაშვილი სამცხე–ჯავახეთის სახელმწიფო უნივერსიტეტის გაზეთ „მესხეთის უნივერსიტეტის“ რედაქციაში 1996 წლიდან მუშაობს. 1997–2006 წლებში, შემდეგ კი 2009 წლიდან დღემდე არის გაზეთის მთავარი რედაქტორი. გარდა ამისა, მარინა ზედელაშვილი იყო 10–მდე გაზეთის ჟურნალისტი და რედაქტორი. კითხულობდა ლექციებს ახალციხისა და თბილისის უნივერსიტეტებში ჟურნალისტიკის ფაკულტეტის სტუდენტებთან. მინიჭებული აქვს საქართველოს დამსახურებული ჟურნალისტის წოდება. არის ღირსების ორდენის კავალერი.







[ლუბა გიორგაძე, ახალციხე]