ახალციხის დასუფთავების სამსახურს ახალი მეეზოვეები ჰყავს

შპს "კეთილმოწყობის" სამსახურში 2018 წლის 31 დეკემბერს გათავისუფლებული ექვსი მეეზოვის ადგილზე ახალი თანამშრომლები დაინიშნენ. სამსახურში ამბობენ, რომ რამდენიმე ადგილი კიდევ ვაკანტურად დარჩა.

"ავიყვანეთ ოთხი ახალი მეეზოვე. ერთი ადგილი კი ერთ–ერთი წასული მეეზოვის დედამ შეითავსა, რადგან ეს მისი შვილის სამუშაო იყო", – ამბობს "კეთილმოწყობის" სამსახურის უფროსი სპეციალისტი ირაკლი კურტანიძე.

მისივე თქმით, სამსახურმა შესაძლოა იმაზე მეტი მეეზოვე აიყვანოს, ვიდრე გაათავისუფლეს – "შესაძლოა კიდევ დავამატოთ ხალხი, საქმე როგორც მოითხოვს იმის მიხედვით".

"კეთილმოწყობის" სამსახურის უფროსის კობა კურტანიძის განმარტებით, მსურველები განცხადების საფუძველზე შეირჩევიან: "მეეზოვეობაზე კონკურსი გამოცხადებული არაა. ზოგადად რთული სამუშაოა, ამიტომ მსურველები, ვინც იყვნენ თითქმის ყველანი მუშაობს ჩვენთან. დღესაც შეუძლია ვინმეს რომ მოვიდეს და დაწეროს განცხადება".

[მარიამ ბარძიმაძე, ახალციხე]