დასუფთავების სამსახურის თანამშრომლები წვიმაში აღარ დასველდებიან

„თანამშრომლებს გავუუმჯობესეთ პირობები. არ ჰქონდათ საწვიმარი ქურთუკები და წვიმის დროს სველდებოდნენ. სამომავლოდ ინვენტარით აღჭურვასაც ვგეგმავთ“, – ამბობს შპს „კეთილმოწყობის“ უფროსი სპეციალისტი გიორგი ლონდარიძე.

ქალაქ ახალციხის მერის გიორგი კოპაძის თქმით, უახლოეს მომავალში „კეთილმოწყობის“ სამსახურისთვის ავტოპარკის განახლებაც იგეგმება: „შევიძინეთ ერთი ახალი მანქანა. მოლაპარაკებები გვაქვს თბილისის მერიასთან და მე ვფიქრობ რამდენიმე მანქანას გადმოგვცემენ საჩუქრად, რათა პარკი გაახლდეს. შეძენილი გვაქვს ახალი ბუნკერებიც“.

დასუფთავების სამსახურში 37 მეეზოვე, 24 მანქანის მუშა და მძღოლი მუშაობს. მათი უმრავლესობა ახალი ფორმებით კმაყოფილია, თუმცა ნაწილი ამბობს, რომ მეტი ყურადღება უნდა მიექცეთ.

„9 წელია ამ სამსახურში ვმუშაობ და შვებულებით არასოდეს მისარგებლია, ამბობენ არ გეკუთვნითო, ასე როგორ შეიძლება?“, – ამბობს მეეზოვე მანანა.



[თინათინ ზაზაძე, ახალციხე]