პრემიერი: განვითარებული ტურისტული ინფრასტრუქტურა რეგიონებშიც გვჭირდება

ამის შესახებ პრემიერმა საერთაშორისო ვიზიტორთა სტატისტიკის პრეზენტაციისას განაცხადა. მისი თქმით, მთავრობა ხელს შეუწყობს ტურისტული მიზიდულობის ახალი ცენტრების შექმნას და ინვესტიციების მოზიდვას ნაკლებად განვითარებულ რეგიონებში. ბახტაძე ამბობს, რომ ტურიზმის განვითარება ხელს უწყობს ეკონომიკის მომიჯნავე დარგების განვითარებასაც.

"მთავრობა ეკონომიკურ პოლიტიკაში განსაკუთრებულ მნიშვნელობას ანიჭებს ინკლუზიურ, ანუ ისეთ ზრდას, რომელიც შეეხება ყველა მოქალაქეს, ტურიზმი კი ეკონომიკის ის სფეროა, რომელიც ყველაზე უფრო უწყობს ხელს ინკლუზიურ ზრდას, განსაკუთრებით მცირე და საშუალო ბიზნესში, რომლის განვითარების გარეშე შეუძლებელია სიღარიბის დაძლევა", – ამცხადებს ბახტაძე.

მისი თქმით, 2018 წლის პირველი სამი კვარტლის მონაცემებით, მთლიან შიდა პროდუქტში ტურიზმის წილი 7,6%-ია, რაც თითქმის 20%-ით მეტია 2017 წლის მაჩვენებელზე: "მთავრობა მუშაობს ტურიზმის თანმიმდევრულ და სტაბილურ განვითარებაზე და აქვს მომდევნო წლებში სექტორის განვითარების სამოქმედო გეგმა".

ოფიციალური მონაცემებით, 2018 წელს საქართველოს სტუმრობდა 8 679 544 საერთაშორისო ვიზიტორი, ხოლო ტურიზმიდან შემოსავალმა გადააჭარბა 3 მილიარდ აშშ დოლარს.

[sknews.ge]