ბორჯომი სამცხე-ჯავახეთის ტურიზმის განვითარების სიმპოზიუმს მასპინძლობს

სიმპოზიუმის მიზანია განსაზღვროს რეგიონში ტურიზმის განვითარებასთან დაკავშირებული პრობლემები და გამოწვევები და დაადგინოს პრიორიტეტები, რაც ხელს შეუწყობს რეგიონის პოპულარიზაციას და მის უკეთ წარმოჩენას, როგორც საქართველოს ერთ-ერთ საუკეთესო ტურისტულ რეგიონს.

სამცხე-ჯავახეთში ტურიზმის განვითარების სამუშაო ჯგუფი, რომლის მიზანიც არის სამცხე-ჯავახეთის რეგიონის ტურიზმის განვითარების მოდელის შექმნის ხელშეწყობა და მისი პოპულარიზაცია, USAID-ის Zrda პროექტმა, საქართველოს ტურიზმის განვითარების ეროვნულ ადმინისტრაციასთან და საჯარო და კერძო სექტორების წარმომადგენლებთან ერთად დააარსა.

"მოდელი ყურადღებას ამახვილებს აგრო, ეკო, სათავგადასავლო და კუტურულ ტურიზმზე და პროცესში მონაწილე მხარეებს შორის თანამშრომლობისა და კოორდინაციის განვითარებაზე. საუკეთესო საერთაშორისო პრაქტიკის გადმოტანა-დანერგვის მიზნით, პროექტმა იმუშავა რუმინეთის არაკომერციულ ორგანიზაციასთან, სიბიუს ოლქის ტურიზმის ასოციაცია (SCTA), რათა გამოიყენოს რუმინეთის ის გამოცდილება, რომელიც ბოლო ოცდახუთი წლის განმავლობაში ამ ქვეყანამ მიიღო ტურიზმის განვითარების სფეროში", – აცხადებენ პროექტის ხელმძღვანელები.

მათივე ინფორმაციით, Zrda-მ უკვე დაიწყო საოჯახო სასტუმროების პოტენციალისა და უნარ-ჩვევების ჩამოყალიბება-განვითარებაზე ზრუნვა და დახმარება გაუწია სამცხე-ჯავახეთის, სამეგრელოსა და პანკისის 233 მცირე და საშუალო ზომის საოჯახო სასტუმროს მეპატრონეებს გაევლოთ AHLEI-ს (ამერიკის სასტუმროებისა და განთავსების საგანმანათლებლო ინსტიტუტი) სასერტიფიკატო ტრენინგები სასტუმროს მართვის საკითხებში.

"აღსანიშნავია პროექტის მიერ ჩატარებული ტრენინგები ციფრული მარკეტინგის საკითებში, რაც, თავის მხრივ, ხელს შეუწყობს მცირე და საშუალო საოჯახო სასტუმროებს გახდნენ საყოველთაოდ ცნობილი საერთაშორისო ელექტრონული დაჯავშნის პორტალების წევრები. აღჭურვილები ცოდნითა და უნარ-ჩვევებით და ახლა უკვე დარეგისტრირებულნი დაჯავშნის საერთაშორისო სამოგზაური საიტებზე, სამცხე-ჯავახეთის მცირე სასტუმროების მეპატრონეები ახალი შესაძლებლობების მოლოდინში არიან", – აცხადებენ სიმპოზიუმის ორგანიზატორები.

[sknews.ge]