ბასილა და ბედის პური – როგორ იბედებდნენ ბარაქიან წელს ძველ მესხეთში [Photo/Video]

მესხური სოფლების ნაწილში, ბედის პურისა და ბასილას ტრადიცია დღემდე შემორჩენილია. ამიტომ, როცა საახალწლოდ ფურნეები ხურდება, მათ მესხურ პურთან, სომინთან ერთად აცხობენ.

ორივე პური სომინის ცომისგან, თუმცა სხვადასხვანაირად მზადდება. ბედის პურის ცომს მრგვალ ფორმას აძლევენ და შიგ ხურდა ფულს დებენ. განსხვავებული რომ იყოს და სხვა პურში არ აირიოს, გუნდას ზემოდან ჩანგლით ხაზავენ და ისე აცხობენ. ბედის პური, ორ იანვარს ბედობას იჭრება და ოჯახში ვისაც ხურდი ფულიანი ნაჭერი შეხვდება, ის წელი მისთვის ბედნიერების მომტანი იქნება.



ბასილაც ბედის პურთან ერთად ცხვება. ცომის გუნდას ადამიანის ტანის ფორმას აძლევენ, უკეთებენ ხელებს, ფეხებს, თავს, თვალებს, პირს. ცხვირის ნაცვლად კი ნახშირს არჭობენ და ისე აცხობენ.

გამომცხვარ პურს ტაბლაზე, ხილთან ერთად დებენ და წყალკურთხევამდე, 19 იანვრამდე ინახავენ. ნათლისღებას კი დილით ოჯახის უფროსი ტაბლაზე დადებულ ბასილას სანთელს დაუნთებს, სახლს გარედან ლოცვით შემოატარებს, უფალს ბარაქასა და ბედნიერებას შესთხოვს, შემდეგ წყალს აპკურებს დაჭრის და ოჯახის წევრებს დაურიგებს.











ბასილა


ბედის პური

[ნანა ინასარიძე, ახალციხე]