დერცელსა და კიკიბოში გზის გადაკეტვით იმუქრებიან

ადიგენის მუნიციპალიტეტის სოფელ დერცელსა და კიკიბოში მცხოვრებლები ამბობენ, რომ მას შემდეგ, რაც მათ სოფლებთან არსებული ტყე-კაფი 10-წლიანი ლიცენზიით კერძო პირზე იური კუბლაშვილზე გაიცა, სოფლებში გზა ძალიან გაფუჭდა.

„ხით დატვირთული სატვირთო მანქანები დაჰყავთ, გზა ისე გააფუჭეს, ვეღარ გაივლი. ერთი მანქანა ხრეშიც კი არ მოუტანიათ და დაუყრიათ სოფელში, ჩვენი ძალებით გვიხდება გზის შეკეთება, - ამბობს რევაზ ბერიძე და ამატებს, რომ კიკიბოსა და დერცელში მცხოვრებლები უკვე შეთანხმდნენ იმაზე, რომ ტყიდან მომავალ დატვირთულ მანქანებს გზაზე გავლის საშუალებას აღარ მისცემენ, - გზას გადავკეტავთ. აღარ გავუშვებთ. უგზოობის გამო დაიცალა სოფლები“.

ჯემალ ბერიძის განცხადებით, ბოლო სამი წლის განმავლობაში, დერცელიცა და კიკიბოც “სოფლის მხარდაჭერის პროგრამის“ ფარგლებში გამოყოფილ თანხას სწორედ გზის პრობლემის გადაჭრას ახმარს, თუმცა ამაოდ, სოფლები მაინც მიუვალია.

„გარდა იმისა, რომ გზა აღარ გვაქვს, ტყესთან ახლოს საქონელი თუ ბალახობს, იმაზეც პრობლემას გვიქმნიან, თუ შეშა გამოვიტანეთ სოფლიდან, 1000 ლარით გვაჯარიმებენ. გარშემო ყველაფერი გაყიდეს“, - ამბობს ჯემალ ბერიძე.

მისი თქმით, ადგილობრივ ხელისუფლებას დახმარების თხოვნით არაერთხელ მიმართეს: „მოიყვანეს ესკალატორი, ორი მანქანა ხრეში დაყარეს და მოასწორეს. ეს იყო და ეს, მაგრამ ახლა იქ არაფერი ეტყობა საერთოდ, გზა უარესადაა გაფუჭებული“.

ადიგენის მუნიციპალიტეტის გამგებელი სიმონ პარუნაშვილი აცხადებს, რომ გასულ წელს გზა ზარზმიდან კიკიბომდე შეაკეთეს. ამისთვის 140,000 ლარი ცენტრალური ბიუჯეტიდან გამოიყო: „მაგრამ სატვირთო მანქანები ისევ აფუჭებენ გზას. ჩვენ მხოლოდ ის შეგვიძლია ამ ეტაპზე, რომ ლიცენზიის მფლობელს მისი შეკეთება ვთხოვოთ“.

ლიცენზიის მფლობელის შპს „შპალ-საჟღენთი ქარხნის“ დირექტორი ნინო ნათენაძე ამბობს, რომ გზა აღნიშნული მიმართულებით არაერთხელ შეაკეთეს: „ამ გზით აღარ ვისარგებლებთ, გზა სხვა მიმართულებით გაგვყავს“.



[თამუნა უჩიძე, ადიგენი]