ვის უკავშირებენ რელიგიური კონფლიქტის გაღვივების მცდელობას?

ადგილობრივი მართლმადიდებლებიცა და მუსლიმებიც აცხადებენ, რომ მათ ათეული წლების განმავლობაში ერთმანეთთან კარგი მეზობლური დამოკიდებულება აქვთ, ახლა კი მათ შორის კონფლიქტის გაღვივებას ქვეყნის არევით დაინტერესებული პირები ცდილობენ.

იმამის მოადგილე დავით ჩოგაძე მიიჩნევს, რომ მინარეთის დემონტაჟის სურვილი არათუ ადგილობრივებს, არამედ ვიღაცა სხვას აქვს. იგი ფიქრობს, რომ მდგომარეობის დაძაბვას ყოფილი ხელისუფლების წარმომადგენლები ცდილობენ, რადგან მათ ქვეყანაში ქაოსური ვითარების შექმნა სურთ.

ჭელაში მართლმადიდებლური ტაძრის მშენებელი ბერდია ქაფიანიძე კი აცხადებს, რომ ამ საქმესთან კავშირი ადიგენის მაჟორიტარ კანდიდატს „ნაციონალებიდან“ , ზურაბ ჩილინგარაშვილს აქვს: „აქ სულ ორი კაცის გამო ხდება ეს ყველაფერი, ერთ-ერთი ასეთი მაჟორიტარი ჩილინგარაშვილი გახლავთ. ალბათ აწყობს, რომ ასე მოხდეს ყველაფერი“.

კონკრეტულად ჩილინგარაშვილს არ ადანაშაულებს ადიგენში მოქმედი ადგილობრივი არასამთავრობო ორგანიზაცია „საზოგადოებრივი დარბაზის“ თავმჯდომარე გოდერძი კუბლაშვილი, თუმცა, იგი დარწმუნებულია, რომ აქ არის მიზანმიმართული პროვოკაცა სახელმწიფოს მიმართ.
„ვის აწყობს ეს, სამართალდამცავებმა უნდა გამოიძიონ. თუ არ აქვთ ამის უნარი, მაშინ სახლში წავიდნენ და სხვას, უფრო მცოდნეს და განათლებულს დაუთმონ ადგილი“, - ამბობს კუბლაშვილი.



შეგახსენებთ,ადიგენის მუნიციპალიტეტის სოფელ ჭელაში მდებარე მეჩეთს გვერდით მინარეთი მიადგეს. მომხდარის შემდეგ სოფელში დაიწყო ხელმოწერების შეგროვება მინარეთის დემონტაჟის მოთხოვნით. ადგილობრივები ამბობენ, რომ სოფელში მუსლიმები და მართლმადიდებლები კეთილმეზობლურად ცხოვრობენ და სიტუაციას ვიღაც ხელოვნურად ძაბავს. მათი ნაწილი ირწმუნება, რომ განცხადებას მათ ნაცვლად ხელი სხვამ მოაწერა. ის ადამიანები, ვინც ხელმოწერებს აგროვებენ, ამბობენ, რომ ახალციხისა და ტაო-კლარჯეთის მიტროპოლიტის მეუფე თეოდორე ჭუაძის კურთხევა აქვთ. ახალციხისა და ტაო-კლარჯეთის ეპარქიასა და არც საპატრიარქოში კი ამბობენ, რომ მომხდარზე არაფერი იციან.

[თამუნა უჩიძე, ადიგენი]