მინარეთის ნგრევის მოთხოვნით ხელმოწერების შეგროვებაზე საპატრიარქოში არაფერი იციან

ჭელაში მართლმადიდებლური ეკლესიის მშენებელის ბერდია ქაფიანიძის, სოფელ დიღმის წმინდა თეოდორე ტირონის სახელობის ტაძრის წინამძღვარის ათანასე ხაბეიშვილისა და სოფელ ფლატის მკვიდრის მართლმადიდებელი შალვა გაგნიძეს განცხადებით, ისინი ხელმოწერებს მინარეთის დაშლის მოთხოვნით ახალციხისა და ტაო-კლარჯეთის მიტროპოლიტის მეუფე თეოდორე ჭუაძის კურთხევით აგროვებენ.

„მღვდლები წასული არიან თბილისში და შეხვედრები იმართება“, - გვითხრა მღვდელმა ათანასე ხაბეიშვილმა.

„სამხრეთის კარიბჭე“ მეუფე თეოდორეს ტელეფონით დაუკავშირდა. კითხვაზე, ნამდვილად მისი კურთხევით გროვდება თუ არა ხელმოწერები გვიპასუხა: „მოსკოვში ვარ, ვერაფერს გეტყვით“ და ტელეფონი გაგვითიშა.

არც ხელმოწერების შეგროვებისა და არც მინარეთის დადგმის შესახებ არაფერი იციან ახალციხეში მეუფის რეზიდენციაშიც.

მომხდარის შესახებ „სამხრეთის კარიბჭისგან“ შეიტყვეს საპატრიარქოშიც.

„მეუფის კურთხევით რომ გროვდებოდეს ხელმოწერები, საპატრიარქო საქმის კურსში იქნებოდა“, - გვითხრა საქართველოს საპატრიარქოს პრესსამსახურის წარმომადგენელმა მაია გაგუამ.

შეგახსენებთ,ადიგენის მუნიციპალიტეტის სოფელ ჭელაში მდებარე მეჩეთს გვერდით მინარეთი მიადგეს. მომხდარის შემდეგ სოფელში დაიწყო ხელმოწერების შეგროვება მინარეთის დემონტაჟის მოთხოვნით. ადგილობრივები ამბობენ, რომ სოფელში მუსლიმები და მართლმადიდებლები კეთილმეზობლურად ცხოვრობენ და სიტუაციას ვიღაც ხელოვნურად ძაბავს.

[თამუნა უჩიძე, ახალციხე]