რა პრობლემების მოგვარება სთხოვეს უნივერსიტეტის რექტორს სტუდენტებმა

შეხვედრზე სტუდენტებთან მაკა ბერიძემ ბოლო პერიოდში უნივერსიტეტში განხორციელებული ცვლილების შესახებ ისაუბრა. მისი თქმით, საგამოცდო ცენტრთან შეთანხმების გარეშე ლექტორები უკვე თავად აირჩევენ იმას, თუ რა ფორმით ჩააბარებენ მათ საგანს სტუდენტები, ეს იქნება წერით თუ ელექტრონულად.

ასევე, რექტორის თქმით, თუ აქამდე უნივერსიტეტში გათბობის სისტემას 15 ნოემბერს რთავდნენ, წელს 31 ოქტომერს ჩართეს: „სტუდენტებს სიცივე აწუხებდათ ამიტომ ადმინსიტრაციამ გათბობა ცოტა ადრე ჩართო. გარდა ამისა, გათბობის სისტემა დავამონტაჟეთ დერეფნებშიც“.

რექტორი სასწავლებელში თანხის გადაუხდელობის გამო სტატუსშეჩერებული სტუდენტების საკითხსაც შეეხო: „მათ დასახმარებლად კომპანიების მოძიებას ვეცდებით, რომლებმაც შესაძლოა სტუდენტების დავალიანება დაფარონ. რამდენიმე კომპანიასთან მოლაპარაკება უკვე გვაქვს“.
სტუდენტები რექტორს სასწავლებელში არსებული პრობლემების შესახებ ესაუბრნენ.

„ქსეროქსით ერთი გვერდის გადაღება 20 თეთრი ღირს. დღეში ხშირად შვიდი ლარის გადახდაც კი მიხდება იმდენი რამაა დასაქსეროქსებელი. სასწავლებელში სიარული სოფლიდან გვიხდება, ამიტომ გადახდა გვიჭრის“, – უთხრეს სტუდენტებმა ბერიძეს.

რექტორის თქმით, ამ შემთხვევაში, გამოსავალი სახელმძღვანელოების ციფრული ვერსიების შექმნაა: „ვიფიქრებთ, ამ კუთხით როგორ დაგეხმაროთ“.
ახალგაზრდების თქმით, სასწავლებელში წყლის დისპენსერში ხშირად წყალი არაა: „თუ წყალია, მაშინ ერთჯერადი ჭიქები აღარაა“.

სტუდენტების თქმით, სასწავლებელში არასაკმარისია სკამებიც: „ნაწილი დაიმტვრა, ამიტომ ხშირად „ბუფეტიდან“ გვიწევს გამოტანა“, – უთხრეს მათ რექტორს.
„წელს, ექვსი აუდიტორიის კომპიუტერიზაცია მოვახერხეთ და ეტაპობრივად მთელი უნივერსიტეტის აღჭურვასაც შევძლებთ. სასწავლებელში ინვენტარის განახლება უკვე დაწყებულია“, – ამბობს მაკა ბერიძე.

შეხვედრის დასრულებამდე რექტორმა დაგეგმილი ინფრასტუქტურული პროექტების შესახებაც ისაუბრა. მისი თქმით, ახალციხის მერიის ფინანსური დახმარებით, მეორე კორპუსთან არსებული სპორტული დარბაზის რეაბილიტაცია იწყება.

„მუნიციპალიტეტს არ შეუძლია უნივერსიტეტის კუთვნილ კორპუსში ჩადოს დიდი თანხა, ამიტომ ჩვენ თანახმა ვართ უზურფრუქტის წესით გადავცეთ მათ ეს შენობა და გაარემონტონ“, – ამბობს ბერიძე და ამატებს, რომ უახლოეს პერიოდში უნივერსიტეტი შშმ პირებისთვის ლიფტის მოწყობასაც გეგმავს.

მისივე თქმით, უნივერსიტეტი ახალი მისიისა და სტრატეგიული გეგმის ჩამოსაყალიბებლად ემზადება: „მანამდე თითოეულ სტუდენტს გადეგზავნება მისიის ვერსია. ამაში გთხოვთ რომ აქტიურად ჩაერთოთ“.



[თორნიკე ზაზაძე, ახალციხე]