სამცხე–ჯავახეთის უნივერსიტეტში შშმ პირებისთვის სველი წერტილი კეთდება

სველი წერტილი სასწავლებლის პირველ სართულზე კეთდება. სამშენებლო სამუშაოებისთვის 2 997 ლარი უნივერსიტეტის ბიუჯეტიდან გამოიყო.

„სასწავლებლის შესაძლებლობებიდან გამომდინარე, მაქსიმალურად ვცდილობთ, რომ დავაკმაყოფილოთ ის სტანდარტები, რასაც ავტორიზაცია და აკრედიტაცია ითვალისწინებს“, – ამბობს სამცხე–ჯავახეთის უნივერსიტეტის რექტორი მაკა ბერიძე.

მისი თქმით, ამ დროისთვის უნივერსიტეტს ეტლით მოსარგებლე არც სტუდენტები და არც თანამშრომლები ჰყავს: „მხოლოდ ერთი შშმ სტუდენტი გვყავს, სხვებმა უნივერსიტეტი უკვე დაამთავრეს“.

სველი წერტილის მშენებლობა უნივერსიტეტში, დაახლოებით, ერთ თვეში დასრულდება.

სასწავლებელში შშმ პირებისთვის ადაპტირებული მხოლოდ პირველი კორპუსის პირველი სართულია. სასწავლებელს კი ავტორიზაციის ახალი სტანდარტები ავალდებულებს, რომ მას შშმ პირებისთვის ადაპტირებული გარემო ჰქონდეს. თუმცა, ამ დროისთვის, ამ მიმართულებით უნივერსიტეტში სხვა სამუშაოები დაგეგმილი არაა.

[თორნიკე ზაზაძე, ახალციხე]