იმ საბავშვო ბაღში, სადაც აღმზრდელებს ძალადობაში ადანაშაულებენ, საგანგებო თათბირი გამართეს

დღეს, 28 მაისს, ახალციხის პირველ საბავშვო ბაღში მშობელთა კრება ორი საათის განმავლობაში მიმდინარეობდა. თათბირი ქალაქ ახალციხის სკოლამდელი აღზრდის დაწესებულებათა გაერთიანებამ ჩაატარა და მას გაერთიანების ხელმძღვანელთან ნანა ბერიძესთან ერთად, იურისტი მარინა აბულაძე, დირექტორის მოადგილე მეთოდურ დარგში მზია ქობესაშვილი, პირველი ბაღის მენეჯერი ქეთევან საანიშვილი, ამავე ბაღის ლოგოპედი და მნე ესწრებოდნენ. თათბირზე იმყოფებოდა „სამხრეთის კარიბჭეც“.

ნანა ბერიძის განცხადებით, იმისთვის, რომ მშობლებს პრობლემების შესახებ გულღიად ესაუბრათ, თათბირს ის აღმზრდელები, რომლებსაც ძალადობაში ადანაშაულებენ, არ ესწრებოდნენ.

„დღევანდელ თათბირზე არ მობრძანდა ის მშობელი, რომლის პრეტენზიისა და ბრალდებების გამოც დღეს ჩვენ აქ შევიკრიბეთ. მან გვითხრა, რომ ადიგენში წავიდა და იქიდან ვეღარ ჩამოვიდოდა“, – განაცხადა ბერიძემ.

იმ ჯგუფში, რომლის აღსაზრდელებსაც ძალადობაში ადანაშაულებენ, სიით 35 ბავშვია რეგისტრირებული. დღევანდელ თათბირს 28 მშობელი ესწრებოდა. 28–ვე მშობელმა ძიძა ლალი კეღოშვილი და მასწავლებელი მეგი გვარამაძე დადებითად დაახასიათა.

„ორი წელია ჩამი შვილი აქ დადის, იცის ზღაპრები, ლექსები, ინგლისური. ის მავნე ჩვევები რაც ჰქონდა ბავშვს, ბაღში გადააჩვიეს. მიხარია ბავშვი რომ მომყავს აქ. 30 ბავშვს რომ უვლიან ერთად, მადლობის მეტი არაფერი მეთქმის“, – ამბობს მშობელი მარიკა ბაბლუანი.

„სამხრეთის კარიბჭეში“ სტატიის გამოქვეყნების შემდეგ, მშობლებმა განაცხადეს, რომ თავიანთ შვილებს ჰკითხეს, ბაღში მათ ხომ არ სცემენ.

„ბავშვმა მითხრა რომ სცემენ. რომ ვკითხე, როგორ გცემენ აბა, ისე თოჯინა სცემე–თქო, აიღო თოჯინა და კუთხეში დააყენა. ავუხსენი, რომ ეს ცემა არ არის. ვერ ვხვდები ბავშვის ნათქვამს როგორ უნდა ენდო?!“ – კთხულობს მშობელი ანა ლოკიანი.

ლიკა ჩიგოგამ სტატიაში აღწერილ იმ ფაქტზე გაამახვილა ყურადღება, სადაც წერია, რომ მასწავლებლები ტკბილეულს მიირთმევენ ყავასთან ერთად ისე, რომ მას ბავშვებს არ სთავაზობენ: „ერთხელ ბავშვს შოკოლადი გავატენე ბაღში, მასწავლებელს მიართვი–მეთქი, მაგრამ ეს რომ მასწავლებელმა გაიგო, მითხრა, აქ ჭამას გვიკრძალავენო, ბავშვების თანდასწრებთ ვერ შევჭამთო“.

მშობელი მადონა ხოსიტაშილი მასწავლებლის უფლებების დაცვაზე საუბრობს და ამბობს: „იქნებ ბავშვი მართალია რასაც ამბობს, მაგრამ იქნებ ტყუის კიდეც?! ამ შემთხვევაში მასწავლებელის უფლებებს ვინ დაიცავს?!“

მშობელმა ქეთევან კეღოშვილმა განაცხადა, რომ თუ ბავშვი საცემია უნდა სცემონ: „რომ თქვეს ბავში სცემეს ბაღშიო, ეკითხათ, იქნებ საცემი იყო?!“

„ამის უფლება არავის აქვს“, – უთხრეს კეღოშვილს ადმინისტრაციის წარმომადგენლებმა.

თათბირზე მშობლებისა და ადმინისტრაციის წარმომადგენლების მხრიდან დიდი დრო დაეთმო იმ ფაქტის კრიტიკას, რომ მშობელი, რომელიც აღმზრდელებს ძალადობაში ადანაშაულებს, თათბირზე არ გამოცხადდა.

„თუ ჩემ შვილს ცუდად ექცევიან, ევროპიდან ჩამოვალ და მის უფლებებს დავიცავ“, „თუ დაიწყო საქმე ბოლომდე მიეყვანა“, „რომ არ მოვიდა, ეჭვი ჩნდება, რომ არაა მართალი“, – ისმოდა რეპლიკები დარბაზიდან.

იმის შესახებ, თუ რატომ არ მიმართა ბაღის ადმინისტრაციამ ბავშვზე შესაძლო ძალადობის შეტყობინების შესვლის შემდეგ სოციალურ სამსახურს, ბაღის მენეჯერმა ქეთევან საანიშვილმა გვიპასუხა: „არ მეცალა, რომ ამაზე რეაგირება მომეხდინა და რაიმე ზომები მიმეღო, მაცალა ამის გაკეთება ვინმემ?!“

ნანა ბერიძის განცხადებით, დღეს როგორი დაზარალებულიც ის ბავშვია, რომლის მშობელიც აღმზრდელებს ბრალდებებს უყენებს, ისეთივე დაზარალებულები არიან ძიძაც და მასწავლებელიც: „დავიჯერო ამდენი მშობელი ტყუის?!“

„თუ ყველა ბავშვს კარგად ექცევიან, მხოლოდ ამ ერთი ბავშვის ინტერესი ჰქონდათ აღმზრდელებს?“ – ასევე კითხულობს იურისტი მარინა აბულაძე.

მან თათბირის დასრულებამდე, ბაღის მენეჯერს ურჩია მორალური ზიანის მიყენებისთვის სასამართლოს მიმართოს.

შეგახსენებთ, რომ პირველი ბაღის აღმზრდელებს მეგი გვარამაძესა და ლალი კეღოშვილს აღსაზრდელის, 5 წლის გოგონას მშობელი ძალადობაში ადანაშაულებს. მისი განცხადებით, ძიძამ ბავშვს რამდენჯერმე თავში წამოარტყა, მასწავლებლებმა კი ბავშვი არა ერთხელ აჯანჯღარეს. ასევე, აღმზრდელები ბავშვის თვალწინ ტკბილეულს მიირთმევენ და ამას პატარებს აყურებინებენ.



[თამუნა უჩიძე, ახალციხე]