ქალმა, რომელიც თოფით მიყენებული ჭრილობებით გარდაიცვალა, წერილი დატოვა

„წერილში წერს, მშვიდი და უკეთესი ცხოვრება მინდოდა რომ მქონოდაო. ქმარს წერდა, მიყვარხარ, მაგრამ მივდივარ და გემშვიდობებიო“, – გვიყვება ოჯახის ახლობელი და ამატებს, რომ წერილი ქალის გარდაცვალების შემდეგ დედამთილმა იპოვა – „ცოტახნით ადრე ძმასთანაც დაურეკია, მოშორებით ცხოვრობს, ცუდად ვარ და ჩამოდიო, ეს ბიჭი რომ მისულა, ის უკვე დაღუპული დახვედრია“.

შინაგან საქმეთა სამინისტრო მომხდარს განზრახ მკვლელობის მცდელობის მუხლით იძიებს, თუმცა, უწყებაში აცხადებენ, რომ კომპლექსური ექპსერტიზის დასკვნის პასუხს ელოდებიან და საქმის გადაკვალიფიცირების საკითხს ამის შემდეგ გადაწყვეტენ.

31 წლის ქალი, გუშინ, 26 ოქტომბერს საკუთარი სახლის ეზოში, სანადირო თოფით მუცლის არეში დაიჭრა. იგი სასწრაფო სამედიცინო დახმარების სამსახურმა ახალციხეში, „იმედის“ კლინიკაში გადაიყვანა. ქალი საოპერაციო ბლოკში გარდაიცვალა, ექიმები ამბობენ, რომ მას გული გაუჩერდა.

[თამუნა უჩიძე, ადიგენი]