ახალციხის მერია არჩევნებამდე 2 დღით ადრე სოციალურ დახმარებას არიგებს

ახალციხის მერიამ, მუნიციპალიტეტში მცხოვრებ 88 ოჯახს 25 კილოგრამი ფქვილი, ხუთი ლიტრი ზეთი, ოთხი კილოგრამი წიწიბურა, შაქარი და ვერმიშელი დაურიგა. ამისთვის ბიუჯეტიდან 5 466 ლარი დაიხარჯა.

პროდუქტის ნაწილი, ერთ–ერთ სოფელში, ფერსაში, დღეს, 26 ოქტომბერს, მერის წარმომადგენელმა ნოდარ ბლიაძემ საკუთარი ავტომანქანით დაარიგა: „ეს იყო კვარტალური დახმარება და სწორედ ეს დღეები დაემთხვა. ჩემს ადმინისტრაციულ ერთეულში ორ ოჯახს მუგარეთში მივეცი, თითო–თითოს ღრელში და გიორგიწმინდაში ხვალ მივიტან“.

მერის წარმომადგენლის მიერ, სოფლებში პროდუქტის დარიგების ფაქტს შეესწრო „ევროპული საქართველოს“ რაიონული ორგანიზაციის თავმჯდომარე გელა დემეტრაძე: „ეს არის ამომრჩევლის მოსყიდვა და მთავრობა ყველა მეთოდს იყენებს, რომ მიაღწიოს სასურველ შედეგს და სალომე ზურაბიშვილს გაამარჯვებინონ".

ახალციხის მუნიციპალიტეტის მერიაში ირწმუნებიან, რომ მოსახლეობისთვის პროდუქტი სოციალური დახმარების წესის ფარგლებში გაიცა. დახმარებას კი სოციალურად დაუცველ ოჯახებისთვის, ყოველ სამ თვეში ერთხელ გასცემენ.

მათი განცხადების მიხედვით, სოციალურად დაუცველებს მერიისგან დახმარება სექტემბრის ბოლოს უნდა მიეღოთ. თუმცა, თვითმმართველობაში ამბობენ, რომ სექტემბრის ბოლოსთვის სოციალური დახმარების წესის გაცემისათვის გამოცხადებული ტენდერი ჩავარდა, ამიტომ ტენდერი მეორედ გამოცხადდა და ამ ყველაფერს ერთი თვე კიდევ დასჭირდა.

ელექტრონული შესყიდვების ვებ–გვერდზე ჩანს, რომ პროდუქტის შესაძენად 15 სექტემბერს გამოცხადებული ტენდერი არ შედგა. მიუხედავად დროში გაჭიანურებული სატენდერო პროცედურებისა, იურისტები ფიქრობენ, რომ მერიას არჩევნების წინადღეებში პროდუქტი არ უნდა დაერიგებინა.

„ბუნებრივია, ამ პროდუქტის დარიგება არჩევნების შემდეგაც შეიძლებოდა. ეს ფაქტი ეჭვებს აჩენს, მითუფრო იმის გამო, რომ დახმარების დარიგება მერიას სექტემბრის ბოლოს უწევდა. ამით აუდიტის სამსახური უნდა დაინტერესდეს“, – ამბობს „ახალგაზრდა იურისტთა ასოციაციის“ იურისტი ქეთი ბებიაშვილი.

[ლუბა გიორგაძე, ახალციხე]