ენმ ახალქალაქის საოლქო კომისიის თავმჯდომარისთვის უფლებამოსილების შეწყვეტას ითხოვს

გაერთიანებულ ოპოზიციაში „ძალა ერთობაშია“ აცხადებენ, რომ ჰასმიკ მარანგოზიანმა, 2012 წლის ოქტომბერში, ახალქალაქში ყოფილი სამხედრო ბაზის (N510/35) ტერიტორიაზე საცხოვრებელი ბინა უსასყიდლოდ მიიღო. ოპოზიციის განცხადებით, ამ ფაქტზე ახალქალაქი-ნინოწმინდის რაიონულმა პროკურატურამ 2013 წლის იანვარში გამოძიება დაიწყო.

„ამ ბინის გადაცემით მარანგოზიანი მოისყიდა „ოცნებამ“ და ის არჩევნებს ისე ატარებს, როგორც ეს მმართველ გუნდს სურს. გარდა ამისა, რადგან მომხდარზე ძიება დაიწყო და ამ დრომდე არ დასრულებულა, პროკურატურას მარანგოზიანის წინააღმდეგ ეს საქმე როგორც კომპრომატი ყოველთვის ექნება. ამიტომ არჩევნებზე იმას გააკეთებინებენ, რისი სურვილიც ხელისუფლებას ექნება“, – გვითხრა „ნაციონალური მოძრაობის“ წევრმა თეონა ჭალიძემ, რომელიც ახალქალაქის საოლქო კომისიის წევრია.

ოპოზიციაში აცხადებენ, რომ ახალქალაქში არჩევნების სამართლიანობასთან დაკავშირებით, ყოველთვის იარსებებს კითხვის ნიშნები როგორც ამომრჩევლის, ისე არჩევნებში მონაწილე სუბიექტების მხრიდან: „ამიტომ, ვითხოვთ თქვენი კომპეტენციის ფარგლებში აღნიშნულ ფაქტზე დროულ რეაგირებას და მონიტორინგს. ასევე გთხოვთ, ცენტრალურ საარჩევნო კომისიას დაავალოთ იმსჯელოს ხსენებულ საკითხზე, მათ შორის ჰასმიკ მარანგოზიანის უფლებამოსილების ვადამდე შეწყვეტის ნაწილზე“, – ვკითხულობთ განცხადებაში, რომელიც გაერთიანებულმა ოპოზიციამ უწყებათაშორის კომისიაში შეიტანა.

ჰასმიკ მარანგოზიანი ადასტურებს, რომ მან ბინა 2012 წელს უსასყიდლოდ ნამდვილად მიიღო, თუმცა ამბობს, რომ ეს „ნაციონალური მოძრაობის“ ხელისუფლების სათავეში ყოფნის დროს მოხდა და ამ საკითხთან „ოცნებას“ შეხება არ ჰქონია.

რაც შეეხება პროკურატურის მიერ მომხდარზე ძიების დაწყებას, ახალქალაქი–ნინოწმინდის რაიონული პროკურატურის ყოფილი პროკურორი და ამჟამად ახალქალაქის მერი იური უნანიანი ამბობს, რომ სამხედრო დასახლებაში ბინების გადაცემის საკითხზე ძიება მართლაც დაიწყო, თუმცა ეს კონკრეტულად მარანგოზიანის საქმეს არ უკავშირდებოდა: „მოქალაქეების განცხადებები იყო შემოსული. შესწავლა რომ დავიწყეთ, აღმოჩნდა, რომ ყველა საქმე სამოქალაქო დავის საკითხი იყო და სისხლის სამართალთან კავშირი არ ჰქონდა“.

[sknews.ge]