ახალციხეში რეწვის სახელოსნოების საერთაშორისო ფესტივალი გაიხსნა

ახალციხეს, გარდა ადგილობრივებისა, თურქეთიდან, ლატვიიდან და აზიიდან ჩამოსული რეწვის ოსტატები სტუმრობენ.

ირინა სალმინა გამოფენაზე თბილისიდან ჩამოვიდა და საკუთარი ნამუშევრებიც გამოფინა. ამბობს, რომ დაახლოებით წელიწადნახევარია, რაც კერამიკაზე მუშაობს. ამიტომ თბილისში საკუთარი სახელოსნოც გახსნა: „კერამიკაზე და შუშაზე, შეიძლება ითქვას, ექსპერიმენტებს ვატარებ. ბუნებრივ, ასევე, გეომეტრიულ ფორმებს ვაკეთებ“. სალმინას ნამუშევრების ფასი 200 ლარიდან იწყება.

გამოფენაში აჭარიდან ჩამოსული თემურ არძენაძეც მონაწილეობს. იგი ჭიბონს, აჭარაში გავრცელებულ ხალხურ ჩასაბერ საკრავს აკეთებს: „ჭიბონებს 40 წელია რაც ვამზადებ. ძველად სულ უკრავდნენ მასზე და მეც ვისწავლე გაკეთება. ეს ჩემთვის შემოსავლის წყაროცაა“.

ფესტივალი ახალციხის ციხის როგორც ქვედა, ისე ზედა ნაწილში მიმდინარეობს. გამოფენა–გაყიდვა დღეს, 14 სექტემბერს დაიწყო და 16 სექტემბერს დასრულდება.

ფესტივალს საქართველოს ხალხური და გამოყენებითი მუზეუმი და საქართველოს ტრადიციული რეწვის ასოციაცია, ახალციხის მერიასა და ახალციხის ციხესთან თანამშრომლობით ატარებენ.







[მარიამ ბარძიმაძე, ახალციხე]