'ოცნების შპარგალკებით მოვიდნენ' – რატომ დაატოვებინეს ენმ–ს წარმომადგენელს ახალციხის საარჩევნო ოლქი

ფოტო: არქივი
N17 მაჟორიტარულ საარჩევნო ოლქში სხდომა გუშინ, 13 სექტემბერს გაიმართა. ამ დღეს ახალციხეში, ადიგენში, ასპინძასა და ბორჯომში საუბნო საარჩევნო კომისიების წევრები აირჩიეს.

ენმ–ს წარმომადგენელი აცხადებს, რომ სხდომა მთელი რიგი დარღვევების ფონზე მიმდინარეობდა. უპარტიო წევრებად ის ადამიანები დაასახელეს, რომლებიც წინა არჩევნებზე „ქართული ოცნების“ წარმომადგენლები იყვნენ და დიცსიპლინარული გადაცდომებიც ჰქონდათ.

„პროტესტის გრძნობა გამიჩნდა იმ ყველაფერზე რაც სხდომაზე ხდებოდა. ადამიანებს წინა არჩევნებზე დისციპლინარული გადაცდომები ჰქონდათ და ისინი აიყვანეს უპრობლემოდ. წინა არჩევნებზე „ქართული ოცნების“ წარმომადგენელი იყო და ახლა ნეიტრალურ წევრად აირჩიეს. მაგალითად მსგავსი შემთხვევა მოხდა ადიგენის N2 უბანზე“, - ამბობს „სამხრეთის კარიბჭესთან“ ვახტანგ ქვათაძე.

მისი განმარტებით, კომისიის წევრები „ქართული ოცნების“ შტაბში შედგენილი სიით ხელმძღვანელობდნენ.

„ჯერ „ქართული ოცნების“ წარმომადგენელი მოხაზავდა, შემდეგ გვერდზე მჯდომი „პატრიოტთა ალიანსი“ იწერდა. ეს იყო ის, რაც გადმოუგზავნა „ქართულმა ოცნებამ“. „ქართული ოცნების“ შტაბში იყო ეს სიები შედგენილი, ამ ქალბატონებს ჰქონდათ მონიშვნები გაკეთებული. შპარგალკებით მივიდნენ“, - ამბობს ქვათაძე და ამატებს, რომ გაპროტესტების შემდეგ მას დარბაზი დაატოვებინეს.

ახალციხის N37 საოლქო საარჩევნო კომისიის თავმჯდომარე, თეა გავაშელი ქვათაძის დარბაზიდან გაშვების სულ სხვა მიზეზს ასახელებს, მისი თქმით ენმ–ს წარმომადგენელი მათ მუშაობას ხელს უშლიდა და სიტყვიერ შეურაცხყოფას აყენებდა.

რაც შეეხება ახალი წევრების არჩევას, გავაშელის თქმით, საოლქომ გადაამოწმა და არცერთი მათგანი 2018 წლის არჩევნებზე „ქართული ოცნების“ სახელით არ ყოფილან.

„ის ადამიანი გამოთქვამდა პრეტენზიას, ჰქონდა წამოყვირებაც და ხშირად გვეშლებოდა ხელი, „ეს იციან თქვენმა კომისიის წევრებმა, ის იციან?“ – სულ ასე კითხულობდა. თავისი უფლება– მოვალეობები უნდა სცოდნოდა, დაკვირვებოდა, მაგრამ კომისიისთვის მუშაობაში ხელი არ უნდა შეეშალა, გავაფრთხილეთ არაერთხელ, ბოლოს გადმოვიდა კომისიის წევრების და ჩემს შეურაცხყოფაზე“, - ამბობს გავაშელი.

„ნაციონალური მოძრაობის“ ახალციხის შტაბში აცხადებენ, რომ ახალციხის საოლქო საარჩევნო კომისიიდან სხდომის ოქმს ელოდებიან, მისი შესწავლის შემდეგ გადაწყვეტენ შეიტანენ თუ არა საჩივარს, ვახტანგ ქვათაძე სხდომაზე მხოლოდ სიტყვიერი შენიშვნით შემოიფარგლა.

საოლქო საარჩევნო კომისიებს საუბნო საარჩევნო კომისიის წევრების არჩევა 11–დან 15 სექტემბრამდე შეუძლიათ.

[მარიამ ბარძიმაძე]