‘დაბინძურებულ წყალს გველიც კი მოყოლია’ – სასმელი წყლის პრობლემა აწყურში

აწყურში, სადაც 1 500 კაცზე მეტი ცხოვრობს, მესამე თვეა მოსახლეობის ნაწილს სასმელი წყალი არ აქვს. იქ კი სადაც წყალია, ძალიან ცოტა მოდის და ისიც დაბინძურებულია. სოფელში ამბობენ, რომ მილები ნაგავმა გაჭედა და გასაწმენდია. ადგილობრივები დახმარებას თვეებია ითხოვენ და როგორც თავად ამბობენ, ამ დრომდე არაფერი გაკეთებულა.

„წყალს მოყვება სილა, ჭიანჭველები, ბაყაყი, გველი და რაც კი შეიძლება რომ მილში გამოეტიოს. სოფლის 90%–ს კი ეს წყალიც არ აქვს. ჩვენთან გრაფიკით მოდის და ისიც ისეთი ცოტა, რომ ჭურჭლის გავსებას ვერ მოასწრებ“, – ამბობს აწყურის მკვიდრი მარინა მუმლაძე.

როგორც მისი მეუღლე ლევან მუმლაძე გვიყვება დასალევ წყალს მეზობლისგან ეზიდებიან: „ოთხ ადგილბრივს თავისი სახსრებით ჰყავს ტყიდან გამოყვანილი წყალი და იქიდან მოგვაქვს. ამ წყალს სუნი აქვს და ვერ დავლევ".

მათ მეზობლად მცხოვრები ნოდარ ლაბაძე გვიყვება, რომ სასმელი წყლის გამო ბავშვი მოეწამლათ: „სოფელი რომ დაიაროთ ბევრს ნახავთ ისეთს, ვინც ამ წყალმა ცუდად გახადა. მე დიდიხანია ვეღარ ვსვამ“.

ადგილობრივები ამბობენ, რომ თვეებია სოფლის რწმუნებულს რომან გორგაძეს წყლის პრობლემის მოგვარებისთვის დახმარებას სთხოვენ, თუმცა ამაოდ.

„გვატყუებენ სულ, ბოლოს გვითხრეს 10 სექტემბერს გექნებათ სუფთა წყალიო. ოთხი დღე დარჩა 10 სექტემბრამდე, მაგრამ ჯერ არაფერი გაუკეთებიათ“, – ამბობს აწყურში მცხოვრები ბელა მახათაძე.

რომან გორგაძე „სამხრეთის კარიბჭეს“ ინტერვიუზე ჯერ შეუთნახმდა, შემდეგ კი სოფელში მისულებს დაგვემალა და ბოლოს ტელეფონიც გამორთო.

საქართველოს გაერთიანებული წყალმომარაგების კომპანიაში გვითხრეს, რომ აწყურის წყლის სისტემა მათ ბალანსზე არაა და ამ საკითხის მოგვარება ადგილბორივი თივთმმართველობის კომპეტენციაა.

ახალციხის მერიაში კი კითხვებზე პასუხის მისაღებად წერილობით მიმართვა გვთხოვეს. რედაქციამ საჯარო ინფორმაციის მისაღებად წერილი მერიას, გუშინ, 5 სექტემბერს გაუგზავნა.






[თორნიკე ზაზაძე, ახალციხე]