აწყურის რწმუნებული: ბასეინების ხუფები მოიპარეს და წყალი იმიტომ ბინძურდება

რომან გორგაძე „სამხრეთის კარიბჭეს“ მას შემდეგ დაუკავშირდა, რაც რედაქციამ აწყურში სასმელი წყლის პრობლემაზე სტატია გამოაქვეყნა: „ბასეინების ხუფები მოიპარეს და წყალი იმიტომ ბინძურდება. ფილტრებიც ძველია, კომუნისტების დროინდელი და ახლა უნდა აღვადგინოთ, რომ სუფთა წყალი მიიღოს ხალხმა. ეს სათავე ნაგებობაც 1972 წელსაა აშენებული და იმის მერე რემონტი არ ჩატარებია“.

მისი თქმით, სასმელი წყლის პროექტის განხორციელება თისელში იგეგმება და იმ პროექტის ფარგლებში აწყურში მოსახლეობის ნახევარიც მომარაგდება: „სოფლის გამოღმა ნაწილში კი წყლის პროექტი შარშან განხორციელდა“.

შეკითხვაზე რას გულისხობდა აღნიშნული პროექტი გორგაძემ გვიპასუხა, რომ ახალი დანიშნულია და დეტალების შესახებ ინფორმაცია არ აქვს.

აწყურში სასმელი წყლის ავზები, საიდანაც სოფელი მარაგდება თავღიაა. ამიტომ როგორც ადგილობრივები ამბობენ, წყალი დაბინძურებულია და ხშირად ონკანში ტალახსა და ფოთლებს ქვეწარმავლებიც კი მოყვება. მათივე თქმით, ამის გამო მილები გაჭედილია და მოსახლეობის დიდ ნაწილს წყალი არ მიეწოდება. აწყურში მილებისა და ავზების გაწმენდას, ასევე წყლის რეზერვუარებისთვის სახურავების გაკეთებას ითხოვენ.

აღნიშნულ საკითხთან დაკავშირებით „სამხრეთის კარიბჭე“ პასუხს ახალციხის მერიიდან წერილობით ელოდება.

[თორნიკე ზაზაძე, ახალციხე]