ახალციხის წყლის ცენტრალური მილი მესამე წელია მეწყერსაშიშ ზონაშია

როგორც „საქართველოს გაერთიანებული წყალომარაგების კომპანიის“ მშენებლობის დეპარტამენტის უფროსი ლევან წურწუმია ამბობს, იმ კომპანიამ, რომელმაც ტენდერში გაიმარჯვა დაკისრებული მოვალეობა ვერ შეასრულა და ამიტომ ხელშეკრულება შეუწყვიტეს: „ხელშეკრულება 2018 წლის იანვარში გავაფორმეთ. სამწუხაროდ, მან ვერ უზრუნველყო ხელშეკრულებით გათვალისწინებული პირობების დაცვა“.

წურწუმიას თქმით, ტენდერი ერთ თვეში ხელახლა გამოცხადდება: „იმედი გვაქვს გაიმარჯვებს მძლავრი კომპანია, რომელიც შეძლებს სამუშაოების ჩატარებას. მშენებელს ხელშეკრულების გაფორმებიდან სამუშაოების შესრულებისთვის სამი თვე დასჭირდება“.

შეგახსენებთ რომ, სოფელ ურაველთან მეწყერი სამი წლის წინ გააქტიურდა. ეს ის ადგილია, სადაც სასმელი წყლის ცენტრალური მილი გადის. მეწყერის გამო შესაძლოა მილი გაწყდეს და მოსახლეობა სასმელი წყლის გარეშე დარჩეს.

[თინათინ ზაზაძე, ახალციხე]