სამცხე–ჯავახეთის გუბერნატორი: ‘ბაკურიანში დამსვენებლებს კომფორტი უნდა შევუქმნათ“

ამირანაშვილმა ბაკურიანში სხვადასხვა უწყების თანამშრომლებთან შეხვდრა გამართა: „კურორტზე უზრუნველყოფილი უნდა იყოს დამსვენებელთა უსაფრთხოებაც და კომფორტიც. დაბაში არსებული პრობლემების მოგვარება ჩვენი პრიორიტეტია“.

მისი თქმით, ზამთარში, როცა სეზონის პიკია კურორტზე საცობები იქმნება: „არის წყლის პრობლემაც და ამიტომ მინდა, რომ ეს ყველაფერი მანამდე მოგვარდეს ვიდრე დაზამთრდება. მოსაწესრიგებელია გზაც და ბიუჯეტი საშუალებას თუ მოგვცემს, ვგეგმავთ მის რეაბილიტაციასაც“.

გუბერნატორის განცხადებით, იმისთვის რომ უფრო ზუსტად გაიწეროს ის პროექტები, რომლებიც სამომავლოდ დაბაში განხორციელდება, უახლოს დღეებში სამუშაო თათბირი კიდევ გაიმართება: „ვიმსჯელებთ და საბოლოო ცვლილებებზე შევთანხმდებით ერთად“.

პრემიერ მინისტრმა მამუკა ბახტაძემ, ყველა იმ პირებს ვინც ფიზიკურადაა ჩართული კურორტებზე ინფრასტრუქტურის მოწესრიგებაში და მზადყოფნის ხარისხის უზრუნველყოფაში, „ბოლო გაფრთხილება“ 29 აგვისტოს მისცა: "ჩვენ არ ვართ კმაყოფილი იმ მზადყოფნით, რაც გვქონდა კურორტებზე ზაფხულში და, ამასთან ერთად, არ ვართ კმაყოფილი ბაკურიანის და გუდაურის მომზადების დონით, რომელიც ვიხილეთ ზამთარში. ყველას კარგად გვესმის და გვახარებს, რომ ტურისტების რაოდენობა მკვეთრად იზრდება, მაგრამ ეს არ არის არგუმენტი იმისთვის, რომ კურორტები არ იყოს მზად ამ ნაკადის მისაღებად".

[მარიამ ბარძიმაძე, ბორჯომი]