100%–იანი გრანტი ახალციხეში 16–მა აბიტურიენტმა მიიღო

ქალაქ ახალციხის საჯარო სკოლებიდან უმაღლეს სასწვლებლებში 100%–იანი დაფინანსებით 16 აბიტურიენტი ჩაირიცხა. მათ უმრავლესობას სასწავლებლად არჩეული თბილისში არსებული უნივერსიტეტები აქვთ.

„კავკასიის უნივერსიტეტში პიარის მენეჯერის სპეციალობაზე ჩავირიცხე. ვფიქრობ, რომ ეს მომავლის პროფესიაა საქართველოშიც და საზღვარგარეთაც. პიარის სწავლების კუთხით ეს უნივერსიტეტი ერთ–ერთი საუკეთესოა და გამიხარდა, რომ აქ ჩავირიცხე. ამისთვის ძალიან ბევრი ვიშრომე“, – ამბობს ანანო მოსიშვილი.

ნათია ლომიძე ბიზნესის ადმინისტრირების სპეციალობაზე თავისუფალ უნივერსიტეტში ჩაირიცხა: „ეს ის სფეროა, სადაც საკუთარი თავის წარმოჩენას ყველაზე მეტად შევძლებ და ვფიქრობ, რომ ამ პროფესიას სამომავლოდ დიდი პერსეპქტივაც აქვს. ჯერ არ ვიცი მენეჯმენტის განხრით წავალ თუ ფინანსისტი გავხები“.

დავით ბალიაშვილმა სამედიცინოზე ჩააბარა: „თბილისის სახელმწიფო უნივერსიტეტში დიპლომირებული მედიკოსის ერთსაფეხურიან პროგრამაზე მოვხვდი. ქართულში შედარებით დაბალი ქულა მქონდა და არ ველოდი, რომ 100%–იანში გავიდოდი, მაგრამ სხვა საგნების მაღალი ქულები დამეხმარა სრული დაფინანსების მიღებაში. მომავალში ალბათ კარდეოლოგი, ან პედიატრი ვიქნები“.

თბილისის სახელმწიფო უნივერსიტეტში საერთაშორისო სამართლის სპეციალობაზე მოხვდა ახალქალაქში მცხოვრები მარგარიტა ხასანშინაც: „იურისტობა ძალიან მინდა, ასევე, მინდა რომ თბილისში დავსაქმდე“.

დღეს 3 სექტემბერს, სამცხე–ჯავახეთის გუბენრატორმა ბესიკ ამირანაშვილმა ახალციხის ციხეზე 100%–იანი გრანტის მფლობელ სტუდენტებთან შეხვედრა გამართა, მათ წარმატებები უსურვა და სერთიფიკატებიც გადასცა.

„ჩვენი ქვეყნისთვის ძალიან მნიშვნელოვანია განათლებული ახალგზარდები, რადგან ქვეყნის ძირითადი პოტენციალი განათლებაზე გადის. მინდა, რომ ასევე წარმატებულად გააგრძელოთ სწავლა.ზოგადად ნებისმიერ მარათონში სტარტი მნიშვნელოვანია, თუმცა რბოლა კვლავ თუ არ გააგრძელეთ შედეგი არ იქნება“,–მიმართა ამირანაშვილმა სტუდენტებს.

შეხვედრას 16 სტუდენტი ესწრებოდა, თუმცა, მათ შორის არ იყვნენ ისეთები, რომლებიც სამცხე–ჯავახეთის სახელმწიფო უნივერსიტეტში მოხვდენენ. სასწავლებელში ამბობენ, რომ 100%–იანი გრანტის მფლობელი, დაახლოებით, 15 პირველკურსელი იქნება, თუმცა, ჯერ მათი ზუსტი რაოდენობა გარკვეული არაა.

ამ დროისთვის დაზუსტებული არც რეგიონის მასშტაბით 100%–იანი გრანტის მფლობელი სტუდენტების რაოდენობაა . სამცხე–ჯავახეთის გუბერნიაში ამბობენ, რომ სერთიფიკატს სამცხე–ჯავაეთში მცხოვრები ყველა ის სტუდენტი მიიღებს, ვისაც სასწავლებელში სრული დაფინანსება აქვს.



[მარიამ ბარძიმაძე, ახალციხე]