ვინ არიან ახალციხეში 100 პროცენტიანი გრანტის მფლობელი აბიტურიენტები

ერთიანი ეროვნული გამოცდების საბოლოო შედეგები რამდენიმე დღის წინ გამოქვეყნდა. 100 პროცენტიანი დაფინანსება ქალაქ ახალციხის პირველი, მესამე და მეხუთე საჯარო სკოლების მოსწავლეებმა მიიღეს.

ახალციხის პირველი სკოლის კურსდამთავრებულებიდან 100 პროცენტიანი გრანტი მხოლოდ გიორგი ნადირაძემ მოიპოვა. მან თბილისში ბიზნესისა და ტექნოლოგიების უნივერსიტეტში, საინფორმაციო ტექნოლოგიების ფაკულტეტზე ჩააბარა.

მეხუთე საჯარო სკოლაშიც მხოლოდ ერთმა, ლიკა ნათენათემ მიიღო დაფინანსება, მან თბილისის სახელმწიფო სამედიცინო უნივერსიტეტში დიპლომირებული მედიკოსის ფაკულტეტზე ჩააბარა.

ყველაზე მეტმა, ცხრა მოსწავლემ მოიპოვა 100 პროცენტიანი დაფინანსება ახალციხის მესამე საჯარო სკოლაში. ცხრავე აბიტურიენტმა სამცხე-ჯავახეთის სახელმწიფო უნივერსიტეტში ჩააბარა, ისინი ჯერ მოსამზადებელ კურსს გაივლიან.

მერუჟან თადევოსიანი, ანჟელა ვოსკანიანი, ოფელია გრიგორიანი, სუსანა გრიგორიანი, რიფსიმე ეგიანი, ლევონ პეტროსიანი სამცხე-ჯავახეთის უნივერსიტეტში მოსამზადებელი ერთწლიანი კურსის დამთავრების შემდეგ ბიზნესადმინისტრირების ფაკულტეტზე ისწავლიან.

ლარისა არაქელიანს ინგლისურ ფილოლოგიაზე, ხოლო მარგარიტა ტინოიანს დაწყებითი კლასების მასწავლებლის ფაკულტეტზე სურთ სწავლა. სერგეი მურადიანს კი ჯერ არ გადაუწყვეტია მოსამზადებელი კურსის შემდეგ სად გააგრძელებს სწავლას.

[მარიამ ბარძიმაძე]