ახალქალაქში, ორ სოფელში საბავშვო ბაღები აშენდება

კულიკამსა და ჩუნჩხაში ბაღების მშენებლობისთვის ტენდერებია გამოცხადებული. კულიკამში ბაღის მშენებლობის სავარაუდო ღირებულება 175 188 ლარია, ჩუნჩხაში კი ტენდერი 246 800 ლარით კომპანია „ლიკანი 2000–მა“ მოიგო. მან სამუშაოები ხელშეკრულების დადებიდან 90 დღეში უნდა დაასრულოს.

ახალქალაქის მუნიციპალიტეტის მერიის ინფრასტრუქტურის სამსახურის უფროსის ალბერტ ნახატაკიანის თქმით, მომავალი წლისთვის ბაღის მშენებლობა იგეგმება სოფელ გოგაშენშიც: „ამ დროისთვის სოფელ სუნდაში, აზავრეთსა და ბარალეთში საბავშვო ბაღების რეაბილიტაცია მიმდინარობს. ასევე, რეაბილიტაციას ჩავუტარებთ კარტიკამისა და ხულგუმოს ბაღებსაც“.

ბაღების რეაბილიტაციისათვის თანხა ახალქალაქის მუნიციპალიტეტის ბიუჯეტიდან და საქართველოს რეგიონებში განსახორციელებელი პროექტების ფონდიდანაა გამოყოფილი.

[მარიამ ბარძიმაძე, ახალქალაქი]