მეწარმეებს პროდუქტის ინტერნეტში განთავსებას ასწავლიან

ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს ორგანიზებით, დღეს, 13 აგვისტოს ახალციხის ადმინისტრაციულ შენობაში ახალი საპილოტე პროექტის პრეზენტაცია გაიმართა. შეხვედრას ადგილობრივი მეწარმეები ესწრებოდნენ.

პროექტი მსოფლიო ბანკის მხარდაჭერით ხორციელდება და მის ფარგლებში მეწარმეებისთვის ციფრული წიგნიერებისა და ელექტრონული ბიზნესის შესახებ ტრენინგები ტარდება.

„ჩვენ უკვე წარვადგინეთ ექვს რეგიონში მსგავსი ტრენინგები. მეწარმეები სწავლობენ, როგორ უნდა განათავსონ თავიანთი პროდუქტი ინტერნეტში და დამატებითი მომხმარებლები მოიზიდონ Google-ის, Facebook-ის, Booking.com-ის, Airbnb-ის, Ebay-ის, TripAdvisor-ის და სხვა საერთაშორისო თუ ადგილობრივი პლათფორმების მეშვეობით“, –ამბობს პროგრამის ხელმძღვანელი თორნიკე ჯობავა და ამატებს, რომ პროექტის მიზანი საქართველოს რეგიონებში ელექტრონული კომერციის დონის ამაღლებაა.

პროექტის ფარგლლებში, 15–აგვისტოდან 15–სექტემბრამდე ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს კონსულტანტები დაინტერესებულ პირებს დაეხმარებიან დაარეგისტრირონ საკუთარი ობიექტები ინტერნეტ–პლატფორმებზე, შექმნან და მართონ კონტენტი, ასევე, მიიღონ ამომწურავი ინფორმაცია აღნიშნულ საკითხებზე.

ერთი თვის განმავლობაში, კონსულტაციების მიღება მეწარმეებს ახალციხის ადმინისტრაციულ შენობაში, ყოველ ორშაბათს, ოთხშაბათსა და პარასკევს შეეძლებათ.

პროექტის ორგანიზატორების განმარტებით, მსურველები მიიღებენ ვაუჩერებსაც, რომლის მეშვეობითაც ისინი სექტემბრიდან ტრენინგებს გაივლიან. მისი წარმატებით დასრულების შემთხვევაში, სააგენტო მეწარმეებს უფასო ვებ–გვერდის დამზადებას, ხარისხიანი კონტენტის შექმნას და მაღალსიჩქარიან ინტერნეტში ჩართვის შესაძლებლობას სთავაზობს.



[ლუბა გიორგაძე, ახალციხე]