ახალციხის საკრებულომ საარჩევნო მასალების განთავსებისთვის ადგილები განსაზღვრა

სააგიტაციო მასალების განთავსებისთვის ადგილების გამოყოფის თაობაზე საკრებულოს, ცენტრალურმა საარჩევნო კომისიამ მიმართა.

„ათი დღის ვადა გვქონდა, დროში ვიყავით შეზღუდულები, ვიმსჯელეთ და დღეს, 10 აგვისტოს რიგგარეშე სხდომაზე დავამტკიცეთ. გადაწყვეტილებას ცესკოს გადავუგზავნით“,–განმარტა ახალციხის მუნიციპალიტეტის საკრებულოს თავმჯდომარემ გელა ნოზაძემ.

პარტიებს შეუძლიათ სააგიტაციო მასალები გააკრან კულტურისა და რიტუალების სახლების კედლებზე, ავტობუსების მოსაცდელებზე, ღობეებზე, სოფლებში თავშეყრის ადგილებზე, წყაროებთან და ხიდების მოაჯირებზე, ასევე დასახლებულ პუნქტებში არსებულ გზებზე, არანაკლებ 3.8 მეტრის სიმაღლეზე.

„დასახლებებში ძალიან ცოტა გვაქვს ტერიტორიები, რომელიც მუნიციპალიტეტის საკუთრებაშია, ამიტომ შევეცადეთ ადმინისტრაციული შენობების ისეთი ადგილები გამოგვეყენებინა პლაკატების გასაკვრელად, რომლითაც იერსახეს არ დავამახინჯებთ“,–ამბობს გელა ნოზაძე.

სააგიტაციო მასალისათვის ადგილის გამოყოფაზე შენიშვნა ჰქონდა სოფელ ჭაჭარაქის დეპუტატს ზაალ ბერიძეს–„ ჭაჭარაქში მხოლოდ ყოფილი კლუბის ფასადზეა ნებადართული, მაგრამ ეს შენობა ისეთი დაზიანებულია, ვერავინ ვერ უახლოვდება. გარდა ამისა, ეს შენობა საპატრიარქოს საკუთრებაა და არა მუნიციპალიტეტის“.

საკრებულოს თავმჯდომარის განმარტებით ჭაჭარაქში სხვა შენობა არ არის და იძულებულები გახდნენ ეს შენობა შეერჩიათ.

"აღნიშნული ობიექტი საჯარო რეესტრში დარეგისტრირებული არ არის, მიუხედვად ამისა მაინც შევათანხმებთ საპატრიარქოსთან", – ამბობს გელა ნოზაძე.

ახალციხის მუნიციპალიტეტის ტერიტორიაზე, საარჩევნო სააგიტაციო მასალების განთავსებისათვის გამოყოფილი, მუნიციპალიტეტის საკუთრებაში არსებული ობიექტები შეგიძლიათ იხილოთ აქ.


[ლუბა გიორგაძე, ახალციხე]