‘მისაყვედურეს ჟურნალისტები სოფელში შენ ამოიყვანეო’ – რატომ გაუგზავნეს მერს სამადლობელო წერილი ელიაწმინდელებმა

„სამხრეთის კარიბჭეში“ 31 ივლისს გამოქვეყნებული სიუჟეტის – „ელიაწმინდაში სასაფლაომდე მისასვლელი გზის მოხრეშვას ითხოვენ“ – ერთ–ერთი გმირი მურმან კაპანაძე ამბობს, რომ მასალის გამოქვეყნების შემდეგ მას ელიაწმინდის რწმუნებული კახა გელაშვილი შეხვდა: „მისაყვედურა ჟურნალისტები სოფელში შენ ამოიყვანეო, ჟურნალისტებთან შენ იჩივლეო. მე არავინ მომიყვანია, მაგრამ ვუთხარი, რომ თუ დამჭირდება პრეზიდენტსაც ამოვიყვან-მეთქი, ამაზე „ვისპორეთ“ და წავიდა, ხმის ამოღებას ვერავინ დამიშლის და დამაშინებს“.

მასალის გამოქვეყნების შემდეგ ელიწმინდელებს ახალციხის საკრებულოს თავმჯდომარის მოადგილე სოსო კაპანაძე და რწმუნებული კახა გელაშვილი რომ შეხვდნენ, ამის შესახებ სოფელში სხვებიც გვიყვებიან.

„ჩემი ქმარი იყო შეხვედრაზე, იქ უსაუბრიათ იმაზე, რაც ბოლო წლებში სოფელში გააკეთეს. ამის გამო ხალხს მადლიერება გამოუხატია, შეხვედრაზე თითქმის მთელი სოფელი ყოფილა“, – ამბობს ერთ–ერთი ადგილობრივი, რომელიც ვინაობის გამჟღავნებისგან თავს იკავებს.

ადგილობრივებთან შეხვედრას თავად სოსო კაპანაძე და კახა გელაშვილიც გვიდასტურებენ.

„თვითონ დამირეკეს. მე და კახა მივედით ელიაწმინდაში, ერთმანეთშიც ლაპარაკობდნენ და ჩვენც გვითხრეს, ეს რა მოგვივიდაო, ჩვენ ისე გამოგვიყვანეს თითქოს უკმაყოფილოები ვიყავითო, არადა ბატონმა ზაზამ [ახალციხის მერი] ამბულატორიაც გაგვიკეთა, ბაღიც, გზაც და მთაში ეკლესიებიცო და როგორმე მადლობა უნდა გადავუხადოთო. მერე დაუწერიათ წერილი“.

ახალციხის მერმა ზაზა მელიქიძემ ელიაწმინდელების სამადლობელო წერილი 2 აგვისტოს მიიღო: „ბატონო ზაზა სოფელ ელიაწმინდის მოსახლეობა დიდ მადლიერებას გამოვთქვამთ იმის გამო, რომ სოფელს ყურადღება მიექცა, გაკეთდა გზები, გაიხსნა საბავშვო ბაღი, დასაქმდა სოფლის მოსახლეობის ნაწილი, ფუნქციონირებს ამბულატორია, სადაც მოსახლეობას შეუძლია მოვიდეს ჯანმრთელობის გაუმჯობესებისთვის, რაზედაც ხელს ვაწერთ სოფლის მოსახლეობა“, – ნათქვამია წერილში, რომელსაც ჩამონათვალის მიხედვით, 41 ადგილობრივის ხელმოწერა აქვს.

ელიაწმინდელები ამბობენ, რომ წერილი სწორედ იმ უბანში დაიწერა, რომელშიც გზის მოხრეშვას ითხოვდნენ. ხელმოწერების შესაგროვებლად კი „სამხრეთის კარიბჭის“ სიუჟეტის გმირების ოჯახის წევრები დადიოდნენ: „დეპუტატი და რწმუნებული რაც ამოვიდნენ და დაილაპარაკეს, ხელმოწერების შეგროვება ამის მერე დაიწყეს“.

ელიწმინდაში მცხოვრები ჯამბულ მუზაშვილი აცხადებს, რომ სოფელში მერისთვის სამადლობელო წერილის დაწერის სურვილი ყველას ერთად გაუჩნდა. მიზეზს კი ასე ხსნის: „თქვენს სიუჟეტში, ისე ჩანდა თითქოს სოფელი უმადურია იმით, რაც მერიამ გაგვიკეთა. ამიტომ გადავწყვიტეთ, რომ წერილი დაგვეწერა".

სიუჟეტში „მერიის მიერ განხორციელებული პროექტები რომ არ ჩანს“ ამაზე „სამხრეთის კარიბჭესთან“ ახალციხის მერი ზაზა მელიქიძეც საუბრობს: „რამდენიმე ოჯახი რომ უკმაყოფილებას გამოთქვამს მხოლოდ ესაა ნახსენები და რა გაკეთდა ამაზე ნათქვამი არაფერია“.

მისივე თქმით, სასაფლაომდე მისასვლელი გზის 300–მეტრიანი მონაკვეთი, რომელზეც ადგილობრივები უკმაყოფილებას გამოთქვამენ, იმ პროექტშია ჩასმული, რომლის მიხედვითაც ჭვინთა–ელიაწმინდის გზა კეთდება და შიდა ქუჩები იხრეშება.

თუმცა, საპირისპიროს ამბობს სიუჟეტში მერიის ზედამხედველობის სამსახურის უფროსი ემზარ მღებრიშვილი. მისი თქმით, მერიის წარმომადგენლები გზის აღნიშნულ მონაკვეთს შეისწავლიან და თუ საჭიროება მოითხოვს მოხრეშავენ კიდეც.

„არ ვიცი რა თქვა ბატონმა ემზარა მაგრამ, შიდა გზის 300–მეტრიანი მონაკვეთი პროექტშია და მოიხრეშება“, – აცხადებს მელიქიძე.

ელიაწმინდაში, გზის 300–მეტრიანი ავარიული მონაკვეთი, სოფლის ნაწილს სასაფლაოებთან, ხუთ კომლს კი საცხოვრებელ სახლებთან აკავშირებს. ადგილობრივები ამბობენ, რომ განსაკუთრებით წვიმიან ამინდში აქ გადაადგილება შეუძლებელია და ხელისუფლებას ამ ადგილის მოხრეშვას სთხოვენ.

[ლუბა გიორგაძე, ახალციხე]