ახალციხის რაიონული საავადმყოფოს ყოფილი მენეჯერი საკუთარ კლინიკას ხსნის

ახალციხეში, ახალქალაქის გზატკეცილის ჩიხში #3-ში მდებარე ორსართულიან შენობაში სარემონტო სამუშაოები უკვე დასრულდა. აპარატურის ნაწილს ხვალ დაამონტაჟებენ, ნაწილი ჯერ დასაწყობებულია, ნაწილი კი განსაბაჟებელი.

„ჯანდაცვის სამინისტროს მივმართავთ და მარტივი ადმინისტრაციული წესის თანახმად მოვიპოვებთ ნებართვას სატაციონარულ საქმიანობაზე, ეს იქნება გინეკოლოგიური, ქირურგიული, რეანიმაციული, სამეანო და სხვა. რაც შეეხება ამბულატორიულ საქმიანობას, ნებართვა არ სჭირდება“, - გვიხსნის საავადმყოფოს დამფუძნებელი და მენეჯერი დავით მაისურაძე.

მან ახალციხეში ახალი კლინიკის გახსნა მას შემდეგ გადაწყვიტა, რაც ახალციხის საავადმყოფო „ალდაგი ბისიაის“ შვილობილი კომპანიის „ჩემი ოჯახის კლინიკის“ საკუთრებაში გადავიდა. იგი ამ დრომდე აღნიშნულ დაწესებულებაში ყელ-ყურ ცხვირის ექიმია: „იქ არსებული სიტუაცია არ მაძლევს მშვიდად მუშაობის საშულებას. ეს გახლავთ ერთ-ერთი მთავარი მიზეზი, რამაც გადამაწყვეტინა ახალი საავადმყოფოს გახსნა“.

მისი თქმით, თუ 1 ოქტომბრამდე საავადმყოფოდან წამოვა, მაშინ ჯარიმის გადახდა მოუწევს: „ამიტომ, განცხადების დაწერას წამოსვლის შესახებ, არ ვაპირებ, თუ სურთ, თავად გამათავისუფლონ“.

ამბულატორიულ მუშაობას ახალი საავამდყოფო ადგილობრივი ექიმებით დაიწყებს. თუმცა, მიმდინარეობს მოლაპარაკებები და სპეციალისტებს თბილისიდანაც მოიწვევენ. ასვე შეიცვლება მენეჯერიც, დავით მაისურაძე საავადმყოფოში დარჩენას მხოლოდ ექიმის პოზიციაზე აპირებს.

კითხვაზე - ქალაქში მოქმედ საავადმყოფოებს აქ არსებული ტარიფებით გაუწევს თუ არა კონკურენციას გვპასუხობს, რომ ტარიფებზე საუბრისგან თავს შეიკავებს: „არაკორექტულია ვისაუბრო სხვის ტარიფზე ჩემი გადასახედიდან“.

მაისურაძის განცხადებით „იმედი“კანონის შესაბამისად აღჭურვილი და გაწყობილი სამედიცინო დაწესებულება იქნება.



[თამუნა უჩიძე, ახალციხე]